Երևան`   +5 °C
Այսօր`   Երեքշաբթի, 19 մարտի, 2024 թ.

«Բոլորովին կապ չունի՝ վոյաժի համար վճարել է հանրությո՞ւնը, թե՞ ընտանեկան բյուջեն». Հակոբ Բադալյան

180
Շաբաթ, 10 հունիսի, 2023 թ., 01:12
«Բոլորովին կապ չունի՝ վոյաժի համար վճարել է հանրությո՞ւնը, թե՞ ընտանեկան բյուջեն». Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը. «Երևույթը, երբ Հայաստանի բարձրաստիճան տարբեր պաշտոնյաներ տարբեր աշխատանքային այցերի մեկնում են իրենց ընտանիքի անդամների հետ, խնդրահարույց է ամենևին ոչ այսպես ասած ֆինանսական առումով: Ի վերջո, այդ առնչությամբ հնչում է պատասխանը, որ ընտանիքի անդամը պաշտոնյայի հետ մեկնել է ոչ թե պետական, հանրային, այլ անձնական-ընտանեկան միջոցներով:
Ու թվում է, թե՝ վերջ, հարցը փակվեց:
Գործնականում սակայն, խնդիրը ունի մեկ այլ, ու թերևս ոչ պակաս լուրջ կողմ: Փաստացի, այդօրինակ «կառուցվածքով» այցերը վկայում են, որ այս կամ այն երկիր աշխատանքային այցը զգալիորեն դիտարկվել է նաև վոյաժային տրամաբանության մեջ:
Ու բոլորովին կապ չունի՝ վոյաժի համար վճարել է հանրությու՞նը, թե՞ ընտանեկան բյուջեն:
Ինքնին մոտեցումը մտածողության եւ քաղաքական մշակույթի դրսեւորում է, որին ուշադրություն դարձնում են անկասկած ոչ միայն սեփական հանրությունը, այլ նաև արտաքին գործընկերները: Պաշտոնական կարգավիճակում կատարվող այցերի այդ ասպեկտը նրանց համար ինդիկատոր է, թե սեփական կարգավիճակի եւ պետական գործառույթների, հետևաբար պետական քաղաքականության ի՞նչ խորությամբ ընկալում ունի տվյալ գործիչը, և այլ կերպ ասած՝ ու՞մ հետ գործ ունեն իրենք:
Նույնը վերաբերում է հանգամանքին, որը երեւույթի մաս է, երբ հրապարակվում են զբոսաշրջային լուսանկարներ, ինչպես նախորդ գրառումներից մեկում է նշել՝ это тоже я, летом, Новый Афон» տրամաբանությամբ:
Ի վերջո, այդ ամենին հետևում են ոչ միայն սոցցանցայյին հետևորդները կամ երկրպագուները, կամ ընդդիմախոսները: Այդ ամենին հետևում են նաև արտերկրյա գործընկերներն ու անգամ հատուկ ծառայությունները՝ տվյալ պաշտոնյաների հոգեբանական և մտածողական նկարագիրը կազմելու համար:
Հազիվ թե՝ թե տվյալ պաշտոնյայի, թե պետության համար շահեկան կլինի կազմվող «զբոսաշրջային» նկարագիրը եւ դրանով ձեւավորվող վերաբերմունքը, որն իհարկե երբեք չի արտահայտվի ուղիղ, մնալով քաղաքավարի ժպիտի և պինդ ձեռքսեղմումների հետևում»:

Աղբյուրը`   Հակոբ Բադալյան