Անկարան՝ Թուրքիայում Հայաստանի դեսպանություն բացելու մասին

Թուրքիայում Հայաստանի դեսպանության բացման հարցն օրակարգում չէ, սակայն Անկարան և Երևանը աշխատում են սահմանային անցակետերի բացման ուղղությամբ։ Այս մասին A Haber հեռուստաալիքի եթերում հայտարարել է Թուրքիայի արտգործնախարար Մևլութ Չավուշօղլուն։

«Առաջիկայում դա կարող է տեղի չունենալ (Հայաստանի դեսպանատան բացումը), քանի որ նախ պետք է այլ քայլեր ձեռնարկել, մենք բացել ենք մեր օդային տարածքը Հայաստանի համար, բեռնափոխադրումներ են իրականացվում, փոխադարձ օդային հաղորդակցություն է սկսվել, հայ ավիափոխադրողները կարող են մեր տարածքով թռչել երրորդ երկրներ: Բայց ցամաքային անցակետեր բացելու համար, քաղաքական պայմանների հետ մեկտեղ, մենք նախ պետք է ճանապարհներ պատրաստենք, վերականգնենք կամուրջը: Եվ մենք արդեն ունենք կամուրջի կառուցման պայմանավորվածություններ»,- ասել է Չավուշօղլուն՝ հավելելով, որ ենթադրվում է, որ ցամաքային սահմանային անցակետը կբացվի երրորդ երկրների քաղաքացիների և դիվանագիտական ​​անձնագրեր ունեցող անձանց համար։