Մոսկվայում այրվող բիզնես կենտրոնից 120 մարդ է տարհանվել

Մոսկվայի արևմուտքում գտնվող Grand Setun Plaza բիզնես կենտրոնում այսօր հրդեհ է բռնկվել, որին տրվել է բարդության ամենաբարձր գնահատականը։

Ըստ առկա տեղեկությունների՝ հրդեհի պատճառ կարող էր լինել ոչ պատշաճ տեղադրման պատճառով կարճ միացումը։ Գորբունովա փողոցում այրվող շենքից մոտ 120 մարդ է տարհանվել։

Արտակարգ իրավիճակների նախարարությունն ընդգծել է, որ հրդեհի մակերեսը կազմում է մոտ հազար քառակուսի մետր։ Հրդեհի մարմանը ներգրավվել է 180 մարդ և 41 տեխնիկա։

Հրդեհի մասին տեղեկություն է ստացվել Մոսկվայի ժամանակով 09:31-ին։ Արտակարգ իրավիճակների ծառայության ներկայացուցիչների խոսքով՝ հրդեհը պատել է շենքի չորս հարկերը: Կեսօրին արդեն հրդեհը մարվել է, զոհերի մասին տեղեկություն չկա: 2 մարդ դիմել է բուժօգնության: