«Կենդանիների խնամակալները կա՛մ աշխատանքից հեռացվել են, կա՛մ սեփական դիմումի համաձայն դուրս եկել»․ Ն․ Կիրակոսյան

Լրագրող Նարինե Կիրակոսյանը գրում է. «Երեկ, ինչպես ավելի վաղ հայտնել էինք, Երևանի քաղաքապետարանում կայացավ կենդանաբանական այգու խորհրդի նիստը, որին մոտ մեկուկես ժամ ուշացումով ներկայացել է նաև այգու տնօրենի ժ/պ Արևիկ Մկրտչյանը։ Ուշացման նրա պատճառաբանումը եղել է. «կենդանիների համար մսի առք կազմակերպելը»: Ուշացած ժ/պ ից խորհրդի անդամները, այնուամենայնիվ, պահանջել են կենդանիների մասին հաշվետվություն ներկայացնել։ Հարցեր են տվել վերջին անկումների վերաբերյալ, սակայն չեն ստացել բավարար պատասխաններ, թե այգում ներկա պահին քանի՞ կենդանի է բնակվում, քանի՞սն են անկել և ի՞նչն է եղել մասսայական անկումների պատճառը։
Այգուց ավելի վաղ վագրի անկման մասին լուր էին տարածել։ Ըստ խորհրդի անդամների այդ լուրը հերքվել է տնօրենի ժ/պ Ա. Մկրտչյանի կողմից, իսկ լուր հայտնող աշխատակիցը իբր հեռացվել է աշխատանքից։ «Վագրին մի կերպ փրկել ենք», ըստ խորհրդի անդամների ասել է Ա. Մկրտչյանը։
Միաժամանակ, ըստ այգու խորհրդի անդամների, տնօրենի ժ/պ Ա. Մկրտչյանը հաստատել է մնացած կենդանիների անկման փաստը, իսկ անկման պատճառները չեն մեջբերվել, քանի որ, ըստ նրա, «դեռ չեն ստացել լաբորատորիայից անկման պատճառների հետազոտությունների վերջնական պատասխանը»։
Մենք նույնպես փորձեցինք կապ հաստատել Ա. Մկրտչյանի հետ, բայց լսելով, որ զանգահարողը լրագրող է, նա դրեց լսափողը։ Կենդանաբանական այգու խորհուրդը իր հետագա նիստերին այգու տնօրենի պաշտոնի համար մրցույթի կանոնակարգը պետք է մշակի և ներկայացնի քաղաքապետարան։ Ժամկետներ չեն մեջբերվում։
Հիշեցնենք, որ Երևանի կենդանաբանական այգու խորհուրդը ստեղծվել էր տևական ժամանակ այգու տնօրենի միանձնյա որոշումներ կայացնելուն ընդդեմ ելած աշխատակիցների բողոքի ակցիաների ֆոնի վրա։
Այս պահին գրեթե բոլոր կենդանիների խնամակալները կա՛մ աշխատանքից հեռացվել են, կա՛մ սեփական դիմումի համաձայն դուրս եկել։ Այգու առկա ղեկավարությունը չունի կենդանաբանի մասնագիտացում և նշանակվել է քաղաքապետարանի կողմից առանց մասնագիտական հիմնավորման»: