«Հանգիստ սպասում ենք». տուրիստական միկրոավտոբուսների վարորդները վերադարձան հրապարակ

Ինչպես արդեն տեղեկացրել էինք, Հանրապետության հրապարակում կայանող տուրիստական միկրոավտոբուսների վարորդներն իրենց բողոքի ակցիան տեղափոխել են քաղաքապետարանի դիմաց՝ պահանջելով հարցի անհապաղ լուծում:

Վերջինների հետ քիչ առաջ զրուցում էին Երևանի քաղաքապետարանի տրանսպորտի վարչության պետի ժամանակավոր պաշտոնակատար Էդգար Գալստյանն ու քաղաքապետի մամուլի խոսնակ Հակոբ Կարապետյանը:

Է. Գալաստյան ասաց, որ արդեն 10 օր է զբաղվում է այդ հարցով. «Կայանտեղերը լինելու են առանձնացված՝ և՛ միկրոավտոբուսների, և՛ ավտոբուսների համար: Դրանից հետո, իրավական ակտերի նախագծերը և տարբերիչ նշանով մեքենաների համար հարցը քննարկվել է և կառավարություն է գնացել»,- ասաց նա՝ խոստանալով այսօր սպառիչ պատասպան տալ վարորդներին:

Վերջիններն էլ իրենց հերթին խոստացան մինչև օրվա վերջ սպասել. «Հանգիստ սպասում ենք, օրինախախտումներ չենք անելու: Քանի որ մեքենաները կայանելու տեղ չկա, որովհետև բոլոր պարկինգները զբաղված են, ուստի ստիպված ենք գնալ չթույլատրվող տարածք, որտեղ գծված է, կանգնել ու սպասել մեր պատասխանին»,- եզրափակեցին նրանք: