Երևան`   +9 °C
Այսօր`   Կիրակի, 22 նոյեմբերի, 2026 թ.

Արարատ Միրզոյանը դատական հայց է ներկայացրել ընդդեմ Նարեկ Սամսոնյանի

762
Չորեքշաբթի, 25 դեկտեմբերի, 2019 թ., 12:10
Արարատ Միրզոյանը դատական հայց է ներկայացրել ընդդեմ Նարեկ Սամսոնյանի

ՀՀ Ազգային ժողովի նախագահ Արարատ Միրզոյանը դատական հայց է ներկայացրել ընդդեմ «Քաղաքացիական գիտակցություն» ՀԿ նախագահ Նարեկ Սամսոնյանի: Այդ մասին տեղեկանում ենք Դատական տեղեկատվական համակարգից:

ԱԺ նախագահը հայցով պահանջում է հատուցել վիրավորանքի և զրպարտության միջոցով պատվին, արժանապատվությանը և գործարար համբավին պատճառված վնասը, ինչպես նաև բռնագանձել նախապես վճարված պետական տուրքի և փաստաբանի վարձատրության գումարները:

Հիշեցնենք, որ նոյեմբերի 24-ին Սամսոնյանը գրել էր, թե ԱԺ նախագահն իր ծննդյան օրվա առթիվ մերձավորների հետ խաշ ուտելու էր գնացել և 290 հազար դրամ հաշիվ փակել: Գրառման մեջ Սամսոնյանը Միրզոյանին անվանել էր «պլանքյաշ»:

Դրանից հետո Արարատ Միրզոյանը գրառում էր կատարել՝ նշելով, «Սիրելինե՜րս, տարեդարձիս առիթով երեկ առավոտյան հարազատներիս հրավիրել էի խաշի։ Հավաքույթի ավարտին վճարեցի 290 հազար դրամի կարգի գումար։ Քիչ առաջ տեսա իմ և այս միջոցառման մասին մի զզվելի գրառում, որում առկա ստի, վիրավորանքների և զրպարտության համար դատական հայց եմ ներկայացնելու հեղինակի դեմ»:

Գործը մակագրվել է դատավոր Արշակ Պետրոսյանին: Դատական նիստի օր դեռ նշանակված չէ: Դատարանը հայցադիմումը ստացել է դեկտեմբերի 23-ին: