Mercedes-Benz-ը վերածնել է 1900 թվականի Mercedes 35 PS-ը

Mercedes-Benz-ը ներկայացրել է արտասովոր կոնցեպտ՝ Vision Mercedes Simplex անվամբ: Նախատիպը մշակված է ռետրո ոճով՝ 1900 թվականի Mercedes 35 PS-ի նմանությամբ:

Այն ցուցադրվելու է Design Essentials 2019 ցուցահանդեսին, որը կկայանա Ֆրանսիայի Նից քաղաքում:

Անցյալի և ապագայի այս ինքնատիպ միաձուլումն ունի 4 մեծ անիվ, էկրան՝ ռադիատորի ցանցի փոխարեն և կաշվե պայուսակ՝ բեռնախցիկի փոխարեն: Այն չունի դիմապակի:

Անալոգային ժամերով վահանակը վիրտուալ էկրան է, որի վրա արտացոլվում են վարորդին անհրաժեշտ բոլոր տվյալները: Տեխնիկական բնութագիրը դեռևս հայտնի չէ, սակայն ենթադրվում է, որ այն կունենա էլեկտրական շարժիչ:

Օրիգինալ Mercedes 35 PS-ը ստեղծվել է 1900-1901 թվականներին Ավստրոհունգարայի հայտնի գործարար ու հյուպատոս Էմիլ Էլինեկի պատվերով: Հենց վեջինիս դստեր անունով էլ մեքենան ստացել է Մերսեդես անվանումը:

Այն եղել է բենզինային շարժիչով ամենահին մեքենաներից մեկն աշխարհում, ունեցել է 35 ձիաուժ հզորություն ու 75կմ/ժ առավելագույն արագություն: Mercedes 35 PS-ը մշակել է ինժեներ կոնստրուկտոր Վիլհելմ Մայբախը: