Վերականգնվել է պերուական թագուհու դեմքը

Գիտնականներին հաջողվել է վերականգնել 1200 տարի առաջ Պերուի տարածքում ապրած կնոջ դեմքը: Նրա գերեզմանը հայտնաբերվել է 2012 թվականին ծովափնյա Ուարմեյ քաղաքից ոչ հեռու:

Գերեզմանափոսում հայտնաբերվել են մեծ քանակությամբ առարկաներ, այդ թվում՝ զարդեր, անոթներ և հյուսելու համար պատրաստված գործիքներ՝ պատրաստված ոսկուց:

Կնոջ գերեզմանը գտնվել է Վարի տաճարային խոշոր կոմպլեքսի մոտակայքում՝ այլ գերեզմանների կողքին: Այդ տարածքում գտնվել է ընդհանուր առմամբ 58 բարձրաստիճան տիկնանց գերեզման: Կանանցից մեկին գիտնականները կոչել են թագուհի Ուարմիա, քանի որ նա թաղված է եղել մեծաքանակ արտեֆակտների հետ՝ մնացածներից առանձին:

Նրա կողքին գտնվել են ոսկյա բազմաթիվ զարդեր, այդ թվում՝ ականջօղեր:

Գտնվել է նաև պղնձե ծիսական կացին ու արծաթե գավաթ:

Նրա կմախքի հետազոտությունը թույլ է տվել ենթադրելու, որ կյանքի մեծ մասն այս կինն անց է կացրել նստած: Հնարավոր է՝ զբաղվել է կտոր գործելով: Պատահական չէ, որ նրա գերեզմանն առավել մեծ պատվի է արժանացվել, քանի որ Ուարի մշակույթում, ինչպես նաև անդյան այլ մշակույթներում, կտորը գնահատվել է ոսկուց ու արծաթից թանկ: