«Իրանն առաջարկում է «ԱՊՀ+1» ձևաչափ ստեղծել»․ Փեզեշքիան

Իրանի նախագահ Մասուդ Փեզեշքիանը ԱՊՀ գագաթնաժողովում առաջարկել է ստեղծել «ԱՊՀ+1» ձևաչափ՝ Թեհրանի հետ կազմակերպության համագործակցությունը զարգացնելու համար: Նրա խոսքով՝ Իրանն իրեն դիտարկում է որպես տարածաշրջանի փոխկապակցված աշխարհագրության բնական մաս, և այդ կապն ունի ոչ միայն աշխարհագրական բնույթ, այլև արմատավորված է պատմության, մշակույթի և ժողովուրդների միջև շփումների մեջ:

Նա հավելել է, որ այս ձևաչափը թույլ կտա զարգացնել համագործակցությունը այնպիսի ոլորտներում, ինչպիսիք են տարանցումը, էներգետիկան, առևտուրը, օգտակար հանածոների արդյունահանումը, ներդրումները, տեխնոլոգիաները, ջրային ռեսուրսները և շրջակա միջավայրի պաշտպանությունը, զբոսաշրջությունը, ինչպես նաև գիտական ու մշակութային կապերը։

«Այսօր տարածաշրջանը, առավել քան երբևէ, իրական բազմակողմ համագործակցության կարիք ունի։ Այս կարևոր և ռազմավարական տարածաշրջանի երկրները պետք է առանցքային դերակատարներ լինեն բազմաբևեռ աշխարհի ձևավորման գործում»,- հայտարարել է Իրանի նախագահը։