«Եվրոպայում հրդեհների և ծայրահեղ շոգի հետևանքով վնասը գերազանցել է 3 մլրդ եվրոն»․ #FT

Եվրոպական երկրներում անտառային հրդեհների և ծայրահեղ շոգի հետևանքով առաջացած տնտեսական վնասները գերազանցել են 3 միլիարդ եվրոն, գրում է Financial Times-ը՝ սեփական վերլուծության հիման վրա։

Լրատվամիջոցի գնահատմամբ՝ հրդեհավտանգ սեզոնի առաջին երկու ամիսներին այրվել է գրեթե 0,5 միլիոն հեկտար տարածք, ինչը միայն եվրոգոտու առավել տուժած հինգ երկրներին պատճառել է 3,1 միլիարդ եվրոյի վնաս։

Թերթը նաև նշում է, որ տնտեսական կորուստների իրական չափը դեռևս ամբողջությամբ պարզ չէ, քանի որ անշարժ գույքի, գյուղատնտեսության և զբոսաշրջության ոլորտներին հասցված վնասների գնահատումը շարունակվում է։

ԵՄ կլիմայի փոփոխության ծառայության՝ «Copernicus»-ի տվյալներով՝ այս տարվա հունիսը Արևմտյան Եվրոպայում դարձել է օդերևութաբանական դիտարկումների ամբողջ պատմության ընթացքում ամենաշոգը։ Տարածաշրջանում օդի միջին ջերմաստիճանը հասել էր 20,74°C-ի։ Ամռան առաջին երկու ամիսներին անտառային հրդեհներից ամենաշատը տուժել են Ֆրանսիան, Իսպանիան, Պորտուգալիան, Հունաստանը և Ռումինիան։