ՑԱՀԱԼ-ը հարվածներ է հասցրել Իրանի անվտանգության մարմինների հրամանատարական կենտրոններին

Երեկ Իսրայելի ռազմաօդային ուժերի տասնյակ կործանիչներ, հիմնվելով Իսրայելի պաշտպանության բանակի հետախուզական տվյալների վրա, մի շարք հարվածներ են հասցրել «իրանական ռեժիմի» ենթակառուցվածքներին՝ Թեհրանում, Շիրազում և Թավրիզում։ Այս մասին հայտնում է Իսրայելի պաշտպանության բանակի մամուլի ծառայությունը։

«Թեհրանում հարվածներ են հասցվել Իրանի անվտանգության մարմիններին պատկանող հրամանատարական կենտրոններին, այդ թվում՝ հետախուզության նախարարությանը և «Բասիջին»։ Բացի այդ, հարվածներ են հասցվել ԱԹՍ-ների, բալիստիկ հրթիռների և ՀՕՊ համակարգերի պահեստավորման և արձակման համար օգտագործվող օբյեկտներին։

Շիրազում թիրախավորվել են ներքին անվտանգության ուժերի հրամանատարական կենտրոնն ու բալիստիկ հրթիռների կայանը։

Թավրիզում ոչնչացվել են իրանական ռեժիմի լրացուցիչ հակաօդային պաշտպանության համակարգեր»,- ասված է հաղորդագրության մեջ: