Մեքսիկայում սպանվել է ամենաորոնվող թմրաբարոնը` «Էլ Մենչո»-ն

Մեքսիկայում անվտանգության գործողության ժամանակ սպանվել է «Խալիսկոյի Նոր Սերունդ» (CJNG) թմրակարտելի ղեկավար Նեմեսիո Օսեգերա Սերվանտեսը, որն ավելի հայտնի է՝ որպես «Էլ Մենչո», հաղորդում է Millenio-ն՝ հղում անելով կառավարության աղբյուրներին։
Հրապարակման համաձայն, անվտանգության գործողությունը տեղի է ունեցել Խալիսկո նահանգի Տապալպա քաղաքում։

Օսեգերա Սերվանտեսի ղեկավարության ներքո կարտելը դարձել է Մեքսիկայի թմրամիջոցների ապօրինի շրջանառության առաջատար կազմակերպություններից մեկը, որը մասնագիտանում է սինթետիկ թմրանյութերի՝ Միացյալ Նահանգներ մաքսանենգության մեջ, գրում է The New York Times-ը։

Նրա մահը լուրջ հարված է խմբավորմանը և կարող է ներքին իշխանության համար պայքարի պատճառ դառնալ, քանի որ տարբեր խմբավորումներ մրցում են ցանցի վերահսկողության համար։
Էլ Մենչոյի մահվան մասին լուրից հետո առնվազն վեց նահանգում անկարգություններ են սկսվել։ Մեքսիկական լրատվամիջոցները հաղորդում են, որ Խալիսկո նահանգում հայտարարվել է արտակարգ դրություն։ Բնակչությանը պաշտպանելու համար ակտիվացվել է «կարմիր կոդ», փակվել են ճանապարհները, իսկ տեղական օդանավակայանը ժամանակավորապես փակ է չվերթների համար։