««Բարենորոգիչ» մի քանիսի հրապարակային ուրացումն ավելի հնչեղ է, քան կղերական ավանդապահների հավատարմության երդումը». Արման Մելիքյան

Արցախի ԱԳ նախկին նախարար Արման Մելիքյանի ֆեյսբուքյան գրառումը. «Ամեն անգամ, երբ ՀԱԵ հոգևորականներից մեկը հայտարարում է, որ կողմ է վարչապետ Փաշինյանի՝ եկեղեցական կյանքը բարենորոգելու ծրագրերին, ԶԼՄ-ներում ու սոցիալական ցանցերում մեծ աղմուկ է բարձրանում, անեծքներ, ամոթանքներ, հայհոյանքներ են հնչում այդ անձի հասցեին: Տևական ժամանակ է, ինչ մեր եկեղեցու պաշտոնական դիրքորոշման մեկ «ուրացողի» ինքնաբացահայտմանը հաջորդում է տասնյակ հոգևորականների՝ եկեղեցուն և Կաթողիկոսին իրենց հավատարմության և սատարման հրապարակավ երդում տալու գործողությունը: Գուցե սխալվում եմ, բայց սա ուշագրավ երևույթ է, այնքանով, որ մի քանիսի դեմ են ելնում բազումք, բայց փոքրամասնություն հանդիսացող «բարենորոգիչ» այդ մի քանիսի հրապարակային ուրացումն ավելի հնչեղ է, մեծ ուշադրություն է գրավում, քան մեծամասնություն կազմող կղերական ավանդապահների հավատարմության երդումը: Մասնագիտական մոտեցման դեպքում գուցե հնարավոր լիներ խուսափել ուրացման բացասական էֆեկտից: Մասնագիտական մոտեցման անտեսման հետևանքն այն է, որ յուրաքանչյուր նոր անհատական ուրացում թուլացնում է Կաթողիկոսի թիմի դիրքերը, մինչդեռ հավատարմության զանգվածային երդումները այդ թիմի դիրքերը չեն ուժեղացնում»: