Դրամաշնորհ է հատկացվել հայ-թուրքական սահմանին գտնվող Շուշանավանքի վերականգնման համար

Հակամարտության գոտիներում մշակութային ժառանգության պաշտպանության դաշինքի (ԱԼԻՖ) հոգաբարձուների գործադիր խորհուրդը հաստատել է ԿԳՄՍ նախարարության ներկայացրած՝ Արմավիրի մարզի Բագարան գյուղի տարածքում գտնվող սահմանամերձ Շուշանավանք (7-րդ դ.) եկեղեցու վերականգնման դրամաշնորհային գումարը (471.674 ԱՄՆ դոլար):

Շուշանավանքը գտնվում է Արմավիրի մարզի Բագարան գյուղից 8 կմ հյուսիս, հայ-թուրքական սահմանագծին՝ Ախուրյան գետի կիրճին ձախակողմից հարող ժայռաբլրի գագաթին: 7-րդ դարով թվագրվող եկեղեցին պատկանում է վեցխորան կենտրոնագմբեթ հորինվածքով եկեղեցիների տիպին: Այն մասն է կազմել Բագրատունյաց մայրաքաղաք Բագարանի։
Վերականգնման աշխատանքները կսկսվեն 2026 թվականից:

Ընթացիկ տարվա ընթացքում ԱԼԻՖ-ի կողմից սա Հայաստանին տրամադրվող երկրորդ դրամաշնորհն է՝ Մատենադարանում արաբատառ ձեռագրերի վերականգնման լաբորատորիայի ստեղծման դրամաշնորհից հետո (74,836 ԱՄՆ դոլար):
ԱԼԻՖ-ը ստեղծվել է 2017թ. Ֆրանսիայի և Արաբական Միացյալ Էմիրությունների համագործակցության արդյունքում։ Եզակի նախաձեռնություն է՝ ուղղված հակամարտության գոտիներում մշակութային ժառանգության պաշտպա­նության մարտահրավերների հաղթահարմանը։ Համարվում է ժառանգության պաշտպանության և վերա­կանգնման առաջամարտիկ։ Ունի միջազգային կազմակերպության և միաժա­մանակ մասնավոր հիմնադրամի կարգավիճակ։