Այվազովսկու «Փրկվածները» կտավը վաճառվել է ռեկորդային գնով

Հովհաննես Այվազովսկու «Փրկվածները» նկարը Sotheby’s-ի աճուրդում վաճառվել է 4,188 միլիոն ֆունտ ստերլինգով։ Ըստ Artprice-ի տվյալների՝ սա նկարչի ստեղծագործությունների համար աշխարհում սահմանված նոր աճուրդային ռեկորդ է,։

Մոտ երեք մետր լայնություն ունեցող «Փրկվածները» նկարն Այվազովսկու ամենամեծ կտավներից է, որ երբևէ հայտնվել է շուկայում։ 1878 թ․ թվագրված այս նկարը վերջին անգամ Sotheby’s-ի աճուրդում ներկայացվել էր 2004 թ․ ապրիլին՝ դառնալով այն ժամանակ ռուսական արվեստի պատմության մեջ վարպետի մեծածավալ կտավը, որ երբևէ մասնակցել է աճուրդի (195 × 266 սմ)։
Sotheby’s-ը, ներկայացնելով նկարը, ընդգծել է, որ Այվազովսկին շարունակում է մնալ եվրոպական ռոմանտիզմի առանցքային կերպար այն պատճառով, որ նա փոթորիկների մեջ տեսնում էր ոչ թե զուտ դեկորատիվ ամպրոպ, այլ մի ուժ, որի հետ մարդը ստիպված է մտնել երկխոսության մեջ ՝ երբեմն վերջին անգամ։

Ավելի վաղ Այվազովսկու ստեղծագործությունների համաշխարհային աճուրդային ռեկորդը կազմում էր 3,2 միլիոն ֆունտ ստերլինգ , երբ 2012 թ․ Sotheby’s-ի աճուրդում վաճառվել էր «Կոստանդնուպոլսի և Բոսֆորի տեսարանը» կտավը։