«Չկա 2001-ի Քի Վեսթի փաստաթուղթը». Կարեն Հարությունյան

Խմբագիր Կարեն Հարությունյանը գրել է. «Ղարաբաղյան կարգավորման վերաբերյալ Կառավարության այսօր հրապարակած փաստաթղթերի մասին։
Նորություն գրեթե չկա։ Մեծ մասը վաղուց հրապարակված է։
Զարմանալի է, որ կառավարությունը 1999-ի տարածքների փոխանակման առաջարկի ոչ թե բնօրինակն է հրապարակում, այլ «Հայկական ժամանակի» տրամադրության տակ ժամանակին հայտնված փաստաթուղթը, ինչը հավաստիության վերաբերյալ հարցեր է առաջացնում։
Չկա 2001-ի Քի Վեսթի փաստաթուղթը։ Պարզ չէ՝ կառավարությունը չունի, դրա համար չի հրապարակում, թե չի ցանկանում հրապարակել։
Զարմանալի է նաև, որ պետությունը բանակցային գործընթացի վերաբերյալ փաստաթղթեր է հրապարակում՝ հղում անելով Կազիմիրով կայքին։
Ի դեպ, Մադրիդյան սկզբունքները և այլ փաստաթղթեր վաղուց հրապարակված են «Անի կենտրոնի» կայքում։
Նորությունը կամ կիսանորությունը Մինսկի խմբի 2019-ի ներկայացրած առաջարկն է (այսպես ասած՝ Լավրովի պլան)։
Հասկանալի չէ նաև փաստաթղթերի հրապարակման մեթոդաբանությունը՝ եթե հրապարակել եք համանախագահ երկրների նախագահների՝ հրապարակայնորեն հասանելի մի հայտարարություն, ապա ինչու չեք հրապարակում մյուսները։
Նմանապես, ինչ չափորոշիչով է հրապարակվում Սերժ Սարգսյանի կոնկրետ նամակը Պուտինին և չեն հրապարակվում նմանատիպ այլ գրագրություններ։
Մի խոսքով, մեծ նորություն չկա, բայց կլինի մեծ քննարկում ու աղավաղում հրապարակված փաստաթղթերի շուրջ»։