«Արարատը մեր աչքերում» միջոցառում` Մայր աթոռի բակում

Սուրբ Էջմիածնի «Վաչե և Թամար Մանուկյան» Մատենադարանը, Մայր Աթոռ Սուրբ Էջմիածնի և Հայկական Բարեգործական Ընդհանուր Միության Հայորդյաց տները և «ՎԱԼ» բարեգործական հիմնադրամը համատեղ, նախատեսում են Հայորդյաց տների երեխաների մասնակցությամբ իրականացնել՝ «Արարատը մեր աչքերում» հոգևոր և կրթամշակութային ծրագիր, որն ուղղված է երեխաների ստեղծագործական կարողությունների զարգացմանը, մեր մշակութային ժառանգության ամրապնդմանը և հոգևոր դաստիարակությանը:

Մեկօրյա հոգևոր-կրթամշակութային նախագիծը նախատեսում է շուրջ 150 երեխայի մասնակցություն՝ ստեղծագործական աշխատարաններով, բացօթյա նկարաշարով և խորհրդանշական ցուցադրությամբ։

Միջոցառման ընթացքում երեխաները հայացքը դեպի Արարատ լեռն ուղղած՝ կպատկերեն այն իրենց գեղարվեստական ընկալմամբ։

Արարատ լեռը հայ ժողովրդի ինքնության խորհրդանիշն է, որը դարեր շարունակ ուղեկցել է ոչ միայն հայ ժողովրդի պատմությանը, այլև ապրել յուրաքանչյուր հայի հոգու մեջ։ Նախաձեռնությունը միտված է ազգային ինքնության, արվեստի, կրթության և խաղաղ ինքնարտահայտման խթանմանը։

Միջոցառումը նախատեսված է իրականացնել Ս․ Էջմիածնի Մատենադարանի հարակից տարածքում։

Միջոցառումը կիրականացվի ս/թ․ հոկտեմբերի 2-ին։ Սկիզբը՝ ժամը 16։00-ին։