Շանթահարված խաչքարը վերականգնվում է

Մոտ 2 տարի առաջ Վայոց Ձորի մարզի Կարմրաշեն վարչական շրջանում «Պահպանության ծառայություն» ՊՈԱԿ-ի մարզային ծառայության աշխատակիցները հերթական շրջայցի ժամանակ նկատել էին վնասված արձանագիր խաչքար ու ահազանգել։
Ուսումնասիրությունից պարզ էր դարձել, որ խաչքարը վնասվել է կայծակի հարվածից:
Վերականգնող ճարտարապետի կողմից արված մանրակրկիտ հետազոտությունը ցույց է տվել, որ կայծակի ուժը բավականին ուժգին է եղել և արդյունքում մոտ 1.0x2.3 մ չափեր ունեցած խաչքարը գրեթե ամբողջությամբ բեկորվել է։ Պահպանված քանդակազարդ և քանդակազուրկ փոքր հատվածներում նախնական շերտավորումներ և ճաքեր էին առաջացել։ Կայծակի հարվածից նաև տեղաշարժվել էր հսկայածավալ ժայռ–պատվանդանը, որի հարավ արևելյան անկյունային հիմնաքարը փշրվել էր։
Խաչքարի բոլոր բեկորները պահպանվել են տեղում։
13-րդ դարի այս արձանագիր խաչքարը «Զվարթնոց» պատմամշակութային արգելոց-թանգարան է տեղափոխվել և մասնագետների վերահսկողությամբ վերականգնվում է։