Ադրբեջանցիները ոչնչացրել են Այվազովսկու` Ստեփանակերտում գտնվող արձանը

Արցախի Մշակութային և Զբոսաշրջության Զարգացման Գործակալությունը ֆեյսբուքյան իր էջում հայտնում է, որ ադրբեջանցիները ոչնչացրել են Ստեփանակերտում կանգնեցված՝ աշխարհահռչակ ծովանկարիչ Հովհաննես Այվազվոսկու հուշարձանը:
Գործակալության գրառման մեջ մասնավորապես ասվում է. «Այս օրը ցավով արձանագրում ենք, որ 2021 թվականին Ստեփանակերտում տեղադրված Այվազովսկու հուշարձանը ոչնչացվել է ադրբեջանական օկուպացիոն վարչակազմի կողմից, այն բանից հետո, երբ 2023 թվականին Արցախի ողջ բնակչությունը բռնությամբ տեղահանվեց հայրենիքից:
Հուշարձանի ոչնչացումը հանդիսանում է Արցախում հայկական մշակութային ներկայության համակարգված վերացման հերթական վկայությունը։ Մենք շարունակում ենք փաստել, արձանագրել և հանրայնացնել մշակութային արժեքների ոչնչացման փաստերը՝ համոզված լինելով, որ դրանք չեն մոռացվելու, և միջազգային հանրությունը կձևակերպի արժանի գնահատական։
Մենք հիշում ենք։ Մենք արձանագրել ենք։ Մենք վերադառնալու ենք»:

Հուշարձանի հեղինակն է հայտնի ռուսաստանցի քանդակագործ Սալավատ Շչերբակովը։ Այն նվիրված էր ոչ միայն համաշխարհային ճանաչում ունեցող հայ նկարչին, այլև Արցախը հայկական և համազգային մշակութային ժառանգությանը միացնող կապերին։
Ծովանկարչի արձանի ոչնչացմանն անդրադարձել է նաև Պետդումայի ԱՊՀ հարցերով հանձնաժողովի փոխնախագահ Կոնստանտին Զատուլինը՝ Lenta.ru-ի հետ զրույցում ադրբեջանցիների այդ քայլն անվանելով պետական մակարդակով խրախուսվող և իրականացվող վանդալիզմ:

Հատկանշական է, որ արձանը ոչնչացվել է նկարչի ծննդյան օրը: