«Արցախյան մշակույթի պահպանման կենտրոնը» կմասնակցի միջազգային Ֆոլկլորային փառատոնին

«Արցախյան մշակույթի պահպանման կենտրոն» ՀԿ-ն ստացել է պաշտոնական հրավեր՝ մասնակցելու 2025 թ. հուլիսի 30-ից մինչև օգոստոսի 16-ը Իտալիայում կայանալիք միջազգային ֆոլկլորային փառատոնին, որը կազմակերպվում է CIOFF®-ի (Ֆոլկլորային փառատոնների և ժողովրդական արվեստի կազմակերպությունների միջազգային խորհուրդ) կողմից՝ ՅՈՒՆԵՍԿՕ-ի գործընկերությամբ։ Այս մասին հայտնում է «Արցախյան մշակույթի պահպանման կենտրոն»-ը։
«Այս հրավերը կարևոր ճանաչում է այն համառ ու նպատակային աշխատանքի, որ իրականացնում է մեր կազմակերպությունը՝ ուղղված արցախյան մշակույթի պահպանմանն ու միջազգային հարթակում արժանապատվորեն ներկայացնելուն։
«Արցախյան մշակույթի պահպանման կենտրոն» ՀԿ կազմում գործող Արցախի ազգային նվագարանների պետական նվագախումբը և Արցախի պարի պետական համույթը ներկայումս Իտալիայում են՝ որպես Հայաստանի պաշտոնական պատվիրակություն։
Նրանք հանդես կգան համատեղ մշակութային ծրագրով՝ ներկայացնելով մեր ավանդական երաժշտությունը և պարարվեստը՝ բազմազգ հանդիսատեսին փոխանցելով մեր հարուստ ժառանգությունը»,- նշված է գրառման մեջ։