«Երևանի ուրարտական ժառանգությունը», «Գառնի հնագիտական համալիրը» և «Քարերի սիմֆոնիան»՝ ՅՈՒՆԵՍԿՕ-ի նախնական ցանկում

ԿԳՄՍ նախարար Ժաննա Անդրեասյանը ֆեյսբուքյան իր էջում մասնավորապես գրել է․ ««Երևանի ուրարտական ժառանգությունը», «Գառնի հնագիտական համալիրը» և Քարերի սիմֆոնիան» այսօր ներառվեցին ՅՈՒՆԵՍԿՕ-ի համաշխարհային ժառանգության նախնական ցանկում՝ արժանանալով համապատասխան կոմիտեի հավանությանը։
Նախորդ տարի արդեն իսկ այդ ցանկում գրանցել էինք Տիրինկատար հնավայրի վիշապաքարերը և մշակութային լանդշաֆտը։ Այսինքն, վերջին երկու տարում երեք հայտ ենք ներկայացրել և ներառել ցանկում։
Դրանից առաջ նման աշխատանք արվել էր 1990-ականների սկզբին։ 1995-ի դրությամբ 4 հուշարձան ունեինք նախնական ցանկերում։ Այսինքն շուրջ 30 տարի ՅՈՒՆԵՍԿՕ-ի համաշխարհային ժառանգության նախնական ցանկում Հայաստանից որևէ նոր հուշարձան չէր գրանցվել։ Այսօր արդեն չորսին գումարվել է ևս երեքը»։