«Հորաքրոջս նկատմամբ հայտարարված հետախուզումը կվերացվի»․ Ռոման Երիցյան

Փաստաբան Ռոման Երիցյանի ֆեյսբուքյան գրառումը․ «Քիչ առաջ Երևան քաղաքի առաջին ատյանի ընդհանուր իրավասության քրեական դատարան (դատավոր Հ.Մանուկյան) բավարարել է հորաքրոջս՝ Լիյա Երիցյանի վերաբերյալ քրեական վարույթով ներկայացրած բողոքս՝ պարտավորեցնելով վարույթն իրականացնող մարմնին վերացնել Լիյա Երիցյանի նկատմամբ հայտարարված հետախուզումը։
Հիշեցնեմ որ, հորաքրոջս նկատմամբ ՀՀ զինվորական քննչական գլխավոր վարչությունն իրականացնում է քրեական հետապնդում և նրան պահում միջազգային հետախուզման տակ այն բանի համար, որ նա 2020 թվականի պատերազմի ընթացքում, հանդիսանալով Ստեփանակերտի զինվորական հոսպիտալի ֆիզիոթերապիայի բաժանմունքի պետ, թողել է ծառայության վայրն ու իր անչափահաս որդուն տեղափոխել Երևան։
Իրականում, որդուն Երևան տեղափոխելուց բացի, Լիյա Երիցյանը Երևանում ստանում է նաև միջազգային գործընկերների կողմից Եվրոպայից Հայաստան կոնկրետ իրեն ուղարկված բժշկական տարբեր սարքավորումներ ու պատկանելիքներ, դրանք իր հետ տեղափոխում Ստեփանակերտ, իսկ ինքն էլ վերադառնում ծառայության և չի լքում Արցախն ու իր ծառայության վայրն անգամ նոյեմբերի 06-ից 07-ը, այսինքն՝ տարհանման օրերին»։