Լիբիայում բարձրաստիճան պաշտոնյայի սպանությունից հետո բախումներ են սկսվել

Լիբիայի մայրաքաղաք Տրիպոլիում մարտական ​​բախումներ են սկսվել, քաղաքի տարբեր հատվածներում կրակոցներ են հնչել, հաղորդում են «Ալ Մայադին» և «Ալ-Աուսաթ» հեռուստաալիքները։

Բախումներն սկսվել են մայիսի 12-ի երեկոյան՝ Նախագահական խորհրդին առընթեր Կայունության աջակցության կառույցի ղեկավար Աբդել Ղանի ալ-Քիքլիի սպանությունից հետո։ Բախումների հետևանքով վեց մարդ է զոհվել:

Տրիպոլիի օդանավակայանը փակ է, քաղաքի բնակիչներին կոչ է արվել մնալ տանը։

Հեռուստաալիքների տվյալներով՝ կրակոցներ են լսվել մայրաքաղաքի Այն Զարա և Սալահ ադ-Դին շրջաններում։ «Ալ Վասաթ»-ի տվյալներով՝ անվտանգության աշխատակիցը սպանվել է Տրիպոլիում գտնվող 444-րդ բրիգադի շտաբում տեղի ունեցած փոխհրաձգության ժամանակ։

Մայրաքաղաքի շտապօգնության բաժանմունքները բերվել են բարձր պատրաստվածության վիճակի։

Տրիպոլիի համալսարանում պարապմունքները չեղարկվել են։ Ազգային միասնության ժամանակավոր կառավարության ներքին գործերի նախարարությունը մայրաքաղաքի բնակիչներին կոչ է արել մնալ իրենց տներում՝ անվտանգության նկատառումներով։