Հութիները հայտարարել են Իսրայելի օդային շրջափակման մասին

Եմենի «Անսար Ալլահ» շարժման հութիները ծրագրում են Իսրայելի լիակատար օդային շրջափակում սահմանել՝ հարվածելով նրա օդանավակայաններին։ Այս մասին հայտարարել է ապստամբների զինված ուժերի ներկայացուցիչ Յահյա Սարիան։

«Իսրայելի՝ Գազայի հատվածում իր ագրեսիվ գործողությունն ընդլայնելու որոշմանն ի պատասխան, մեր զինված ուժերը հայտարարում են, որ կաշխատեն թշնամու լիակատար օդային շրջափակման ուղղությամբ՝ բազմաթիվ հարվածներ հասցնելով օդանավակայաններին»,- հայտարարել է Սարիան՝ ապստամբների կողմից վերահսկվող «Ալ Մասիրա» հեռուստաալիքով։

«Անսար Ալլահ» շարժման ռազմական խոսնակն ավիաընկերություններին կոչ է արել «հաշվի առնել այս հայտարարությունը հրապարակման պահից և չեղարկել դեպի թշնամու օդանավակայաններ բոլոր չվերթները՝ ուղևորների անվտանգությունն ապահովելու նկատառումով»։