«Ուկրաինան չի կարողանա վերադառնալ 2014-ի սահմաններին»․ Ռուբիո

Ուկրաինան չի կարողանա վերադառնալ 2014 թվականի սահմաններին, Fox News-ին տված հարցազրույցում հայտարարել է ԱՄՆ պետքարտուղար Մարկո Ռուբիոն՝ խոսելով Մոսկվայի և Կիևի միջև խաղաղ կարգավորման հասնելու՝ ԱՄՆ նախագահ Դոնալդ Թրամփի փորձերի մասին։

Ռուբիոն համոզված է, որ հակամարտությունը ռազմական լուծում չունի, Ռուսաստանը չի ստանձնի ամբողջ Ուկրաինայի վերահսկողությունը, և Ուկրաինան «չի կարողանա ռուսներին հետ շպրտել այն դիրքեր, որտեղ նրանք գտնվում էին 2014 թվականին»։

Պետքարտուղարի խոսքով՝ Թրամփը Սպիտակ տանն իր պաշտոնավարման առաջին 100 օրերի ընթացքում «ջանքեր է գործադրել խաղաղության հասնելու համար», և այժմ կողմերն ավելի մոտ են համաձայնագրի կնքմանը։

«Առաջին անգամ (երեք տարի առաջ դա այդպես չէր) մենք տեսնում ենք, թե ինչ է պետք Ուկրաինային կանգնելու համար։ Մենք տեսնում ենք՝ ինչ է պետք ռուսներին կանգնելու համար։ Խնդիրն այն է, որ այս դիրքորոշումները դեռևս մի փոքր հեռու են միմյանցից», - ասել է Ռուբիոն։