«Արցախի ղեկավարությունը Բաքվում է՝ Փաշինյանի մեղքով»․ Արա Աբրահամյան

Արցախի ողջ ղեկավարությունն այսօր Բաքվում է, որտեղ ցուցադրական կեղծ դատավարություն է ընթանում, և այդ ամենի մեղավորը Փաշինյանն է։ Այս մասին հայտարարել է Ռուսաստանի հայերի միության ղեկավար Արա Աբրահամյանը։

«Փաշինյանի քաղաքականությունն է հասցրել նրան, որ Արցախի ղեկավարությունն այսօր Բաքվում է, նրա քաղաքականությունն է հասցրել Արցախի կորստին, և այսօր ինչպե՞ս է վարչապետը կարողանում այդ հարցում ոչնիչ չանել, չգիտեմ՝ դա նորմա՞լ է, դա նորմալ չէ՛, անհասկանալի է»,- ասել է Աբրահամյանը։

Փաշինյանն ուզում է ստորագրել Խաղաղության պայմանագիր, որի կետերից մեկը միջազգային դատարաններում հայցերից փոխադարձ հրաժարումն է, հիշեցրել է Աբրահամյանը։

«Այսինքն, այն, որ մեզ սպանել են, այն ինչ արվել է Բաքվում, Սումգայիթում և տասնյակ նման դեպքեր, ուզում է մոռանա՞նք։ Այսօր նա ուզում է, որ մենք չպահանջենք, դատի չտանք, և միայն վախեցնում է՝ ստիպելով, որ ժողովուրդը քննարկի միայն այն հարցերը, որոնք իրենք են ասում, իսկ ի՞նչ ենք մենք ասում ի պատասխան»,- հայտարարել է Աբրահամայանը՝ ռուսաստանաբնակ հայերին կոչ անելով հեռու չմնալ ՀՀ-ում ընթացող գործընթացներից։