«Դատական պրոցեսը հետաձգվել է հարգելի պատճառով»․ Վարդան Ղուկասյան

ԴՕԿ կուսակցության լրատվականը հրապարակել է կուսակցության հիմնադիր Վարդան Ղուկասյանի ձայնային հաղորդագրությունը։ Նա շնորհակալություն է հայտնել Հայաստանում և ԱՄն-ում իր ծննդյան օրը՝ փետրվարի 25-ին, ակցիա իրականացրած քաղաքացիներին և պարզաբանել է, թե ինչու է այդ օրը հետաձգվել դատական նիստը։ «Դատական պրոցեսը հարգելի պատճառով հետաձգվել է, պատճառների մեջ չեմ ուզում խորանալ։ Փաստաբանական խումբն աշխատում է նորմալ, խնդիրը կապված է թարգմանչական աշխատանքների հետ, ընդամենը երկու թարգմանիչ է աշխատում։ Իսկ մեր թշնամիների մուրազը կմնա իրենց փորը։ Չվհատվեք, էլ ավելի վատ վիճակներում ենք եղել, ժամանակը ամեն ինչ կդնի իր տեղը։ Ես տրամադրված եմ դրական, մի փոքր համբերեք»,- ասում է Ղուկասյանը։
Հիշեցնենք՝ ԱՄՆ-ի Մաքսային և միգրացիայի վարչության համաձայն, Վարդան Ղուկասյանը ձերբակալվել է փետրվարի 20-ին՝ միգրացիոն գործընթացի շրջանակներում։ Ըստ ամերիկյան կողմի՝ Ղուկասյանը դեռևս 2022-ի փետրվարի 19-ին մուտք է գործել Միացյալ Նահանգներ, սակայն նախատեսված ժամկետում չի լքել երկիրը:

ԴՕԿ կուսակցության ղեկավարը Հայաստանում մեղադրվում է խարդախության, շորթման, սպառնալիքի, բռնության հրապարակային կոչերի համար, նա մեղադրանքը չի ընդունում: