Կադրային ջարդ` Սպիտակ տանը

Սպիտակ տան Ազգային անվտանգության խորհրդի (ԱԱԽ) մի քանի տնօրեններ պաշտոնանկ են արվել, հայտնում է Reuters-ը՝ հղում անելով իր աղբյուրներին։

Նրանց խոսքով՝ պաշտոնանկությունները եղել են չորեքշաբթի օրն ԱՄՆ նախագահ Դոնալդ Թրամփի և ծայրահեղ աջ ակտիվիստ Լորա Լումերի հանդիպման անմիջական արդյունքը։ Նա երկրի ղեկավարին խնդրել է պաշտոնանկ անել ԱԱԽ մի քանի բարձրաստիճան պաշտոնյաների՝ պնդելով, որ նրանք լոյալ չեն ԱՄՆ-ի առաջնորդին։ Լումերը նաև առաջարկել է Թրամփին աշխատանքից հեռացնել նախագահի ազգային անվտանգության հարցերով գլխավոր օգնական Ալեքս Վոնգին։

Իրավիճակին ծանոթ աղբյուրը Axios-ին ասել է, որ, հավանաբար, 10 մարդ կրճատվել է:

Լումերը հրաժարվել է տրամադրել Օվալաձև աշխատասենյակում կայացած հանդիպման մանրամասները, որին մասնակցել են նաև Վալցը, փոխնախագահ Ջ.Դ. Վենսը և Սպիտակ տան աշխատակազմի ղեկավար Սյուզան Ուայլսը: