Իրանը կկրկնապատկի Հայաստանից էլեկտրաէներգիայի ներմուծումը. դեսպան

Իրանը մոտ ժամանակներս կկրկնապատկի Հայաստանից էլեկտրաէներգիայի ներմուծումը։ Այս մասին SNN գործակալությանն ասել է Հայաստանում ԻԻՀ դեսպան Մեհդի Սոբհանին։

Նա հիշեցրել է, որ մեկ տարի առաջ Հայաստանն ու Իրանը մինչև 2030թ․ երկարաձգել են «Գազ՝ էլեկտրաէներգիայի դիմաց» պայմանագրի ժամկետը։ Այսպես, Թեհրանը Հայաստան է արտահանում տարեկան 360 մլն խմ գազ, դրա դիմաց՝ ներմուծում էլեկտրաէներգիա։

«Մեզ հաջողվել է գրեթե վերջնական փուլ հասցնել նաև Հայաստանից Իրան էլեկտրահաղորդման 3-րդ գիծը, որը շահագործման կհանձնվի առաջիկա մի քանի ամսում, և մենք կկարողանանք կրկնապատկել Հայաստանից էլեկտրաէներգիայի ներմուծումը»,- ասել է դեսպանը։

Նա նշել է, որ առևտրի ոլորտում իրանական կողմին հաջողվել է Հայաստանի հետ ապրանքաշրջանառությունը հասցնել 711 մլն դոլարի։

Սոբհանին ընդգծել է, որ Հայաստանն Իրանի համար կարևոր նշանակություն ունեցող շուկա է։