Ուկրաինայի նոր էկզիստենցիալ սպառնալիքը՝ Եվրոխորհրդարանի ընտրությունների քվեախցերից. The Telegraph

The Telegraph թերթը հոդված է հրապարակել եվրոպական մի շարք երկրներում ծայրահեղ աջ կուսակցությունների աճող ժողովրդականության մասին։ Լրատվականը կարծում է, որ այս ամառ, երբ հունիսին տեղի կունենան Եվրոխորհրդարանի ընտրությունները, Ուկրաինան կկանգնի նոր գոյաբանական սպառնալիքի առաջ։ Ծայրահեղ աջ կուսակցությունների «շատ աղմկոտ» դաշինքը կարող է արգելափակել Կիևին ԵՄ-ի կողմից խոստացված ռազմական օգնությունը:
Նյութում ընդգծվում է, որ աջերը ռեկորդային արդյունքներ են ցույց տալիս Պորտուգալիայում և Նիդեռլանդներում և արդեն ներկա են Հունգարիայի, Ֆինլանդիայի և Իտալիայի կառավարություններում։ Ավստրիայում և Բելգիայում ընտրություններում հաղթելու իրավունքի նախադրյալներ կան, իսկ Ֆրանսիայում և Լեհաստանում նրանք լավ շանսեր ունեն։

Կիևի խնդիրն այն է, որ աջերից շատերը կարծում են, որ Եվրոպան այլևս չպետք է ռազմական օգնություն տրամադրի Ուկրաինային, և ոմանք նաև կողմնակից են, որ Եվրոպան չեղարկի Ռուսաստանի դեմ պատժամիջոցները և Ուկրաինային մղի դեպի խաղաղ բանակցություններ:
Հոդվածի հեղինակը բացատրում է, որ առանձին աջակողմյան կուսակցությունները մեծ աշխարհաքաղաքական կշիռ չունեն, բայց նրանք միասին կարող են արգելափակել ԵՄ արտաքին քաղաքական որոշումները Ուկրաինայի վերաբերյալ Եվրոխորհրդարանում, եթե նրանք կազմեն երրորդ ամենամեծ դաշինքը։

Թերթը հայտնում է նաև, որ, ըստ հարցումների, Եվրախորհրդարանի ընտրություններում եվրոսկեպտիկ կուսակցությունների հաղթանակը կարելի է սպասել ինը երկրում, ևս ինը երկրում նրանք կարող են զբաղեցնել երկրորդ կամ երրորդ տեղը։