#SaudiAramco-ն բարձրացրել է հունիս ամսվա նավթի մատակարարումների գները

Աշխարհի խոշորագույն նավթային ընկերությունը՝ Saudi Aramco-ն, ներկայացրել է իր գնորդների համար նավթի՝ հունիս ամսվա մատակարարումների նոր արժեքը: Ըստ գնացուցակի՝ նավթի գներն աճում են բոլոր շուկաների՝ ներառյալ Ասիայի, ԱՄՆ-ի և Եվրոպայի համար, գրում է Bloomberg-ը:

Գործակալության տվյալներով՝ սաուդյան նավթի գների բարձրացումը շուկային ազդակ է տալիս նավթի պահանջարկի բարելավման վերաբերյալ:
Հունիսի համար դեպի Ասիա մատակարարումների գներն ավելացել են 1 բարելի դիմաց 1,4 դոլար, այժմ պայմանական զեղչը (դիսկոնտը) էտալոնի նկատմամբ իջել է մինչև 5,9 դոլարի մեկ բարելի դիմաց:

Շուկան իրոք լավատեսություն է զգում պահանջարկի վերաբերյալ։ Այս մասին հայտարարել է Raiffeisen Bank-ի վերլուծաբան Անդրեյ Պոլիչուկը: «Այս մասին վկայում է Brent-ի գների բարձրացումը մինչև 30 դոլար մեկ բարելի դիմաց, այս կերպ ներդրողները պատասխանում են Չինաստանում, Գերմանիայում, Ավստրիայում և այլ երկրներում կարանտինային միջոցառումների մեղմացման մասին լուրերին»,- նշում է վերլուծաբանը։ Այնուամենայնիվ, փորձագետը կարծում է, որ ներկայիս միտումը դեռևս չի կարելի կայուն համարել, քանի որ նավթի համաշխարհային պաշարները շարունակում են ավելանալ, չնայած Opec+ համաձայնագրի գործարկմանը: