1940-ի այս օրը ցուցադրվեց «Թոմն ու Ջերին» անիմացիոն մուլտֆիլմի առաջին սերիան

«Թոմն ու Ջերին» անիմացիոն մուլտսերիալը ստեղծվել է ծաղրանկարիչներ Ուիլյամ Հաննայի և Ջոզեֆ Բարբերայի կողմից։ Այն պատմում է Ջերի անունով մկան և Թոմ անունով կատվի թշնամական հարաբերությունների ու արկածների մասին։

Առաջին սերիան ցուցադրվել է 1940 թվականի փետրվարի 20-ին։ Մուլտֆիլմի առաջին սերիաներում հերոսների անուններն ուրիշ են եղել՝ Թոմը Ջասպեր, իսկ Ջերին պարզապես Մուկ կամ Ջինկս։

Մուլտֆիլմը սկսած 1940 թվականից մինչև 1958 թվականը արտադրել է MGM ստուդիան, որի արտադրության տարիներին մուլտֆիլմը համարվել է լավագույնը՝ ստանալով 7 Օսկար, մուլտֆիլմն այլևս չարտադրելու պատճառը ստուդիայի փակումն էր։

1961 թվականին «Rembrandt Films» ընկերությունն իրավունք ստացավ արտադրել մուլտֆիլմը, որի 13 թողարկումներն ամենավատը համարվեցին մուլտֆիլմի պատմության մեջ։ Այնուհետև մուլտֆիլմը 1963 թվականից սկսեց արտադրել «Sib Tower 12 Productions» ընկերությունը մինչև 1967 թվականը։