Երևան`   +4 °C
Այսօր`   Չորեքշաբթի, 18 նոյեմբերի, 2026 թ.

«Քարե դար է, դաշտերս չորացել են. ո՞վ է հաշվարկելու վնասները». բողոքի ակցիա՝ Կառավարության դիմաց

320
Հինգշաբթի, 26 սեպտեմբերի, 2019 թ., 12:00
«Քարե դար է, դաշտերս չորացել են. ո՞վ է հաշվարկելու վնասները». բողոքի ակցիա՝ Կառավարության դիմաց

Կառավարության դիմաց բողոքի ակցիա է իրականացնում Արմավիրի մարզի Գետաշեն գյուղի տնտեսվարող Սամվել Մուրադյանն իր աշխատակիցների հետ, ով ունի 70 հա հողատարածք: Վերջինը բողոքում է, որ ոռոգման ջուր չլինելու պատճառով բերքը չորանում է:

«10 տարի շարունակ մենք ներդրումներ ենք արել և բանջարային տնտեսություն ենք ստեղծել: Ամեն տարի մշակում ենք արժեքավոր բանջարաբոստանային կուլտուրաներ և վաճառում գործարաններին:

«Արարատ ֆուդ» գործարանի հետ մոտ 300 միլիոն դրամի պայմանագիր ունենք, ստացել ենք նաև կանխավճար՝ 58 միլիոն դրամ և 72 հեկտարի վրա աճեցրել այդ կուլտուրաները: Վերջին մեկ ամսվա ընթացքում ջրի գրաֆիկը խախտվում էր, մենք էլ կարծում էինք՝ ջրի խնայողության և ջրի պակասի հետևանքով է տեղի ունենում: Ամսի 15-ին փակեցին գյուղի ջրանցքը, և 9 օր շարունակ ջուր չունեինք: Հետո պարզեցինք, որ ջուրը, խոսքը Արաքսի ջրի մասին է, գնում է ՀԷԿ, ամբողջ ընթացքում աշխատում ՀԷԿ-ի հետ, այնուհետև հոսում է դեպի Թուրքիա և Իրան»,- պատմում էր տնտեսվարողը՝ նշելով, որ դրա հետևանքով չորացել է իր բերքը և այսօր փոխհատուցում է պահանջում: «Ստիպված եղանք դիմել մարզպետարան, իրենք չունեին իրավասություն՝ ճշտելու վնասի չափը»,-դժգոհեց Ս. Մուրադյանը, ում խոսքով՝ ջրային ռեսուրսներն ընդհանարպես չեն աշխատում գյուղում. «Քարե դար է, ցեխոտ 4 մետրանոց առուներ են, որտեղ ինչ տեսակի կեղտ ասես կա... Բոլոր կառույցները հրաժարվում են մեր վնասները հաշվարկել: Եթե այս հարցին լուծում չտրվի, մենք պատրաստ ենք նույնիսկ ճանապարհ փակել»,- ասաց տնտեսվարողը՝ նշելով, որ միակ լուծում տվողն, այս պարագայում, կառավարության հանձնաժողովն է: