Թրամփը Ռուսաստանի պատճառով վիճել է G7-ի առաջնորդների հետ․ The Guardian

ԱՄՆ նախագահ Դոնալդ Թրամփը Բիարիցում G7-ի գագաթնաժողովի ժամանակ վիճել է մյուս երկրների առաջնորդների հետ՝ պնդելով, որ Ռուսաստանը պետք է կրկին անդամակցի այս կառույցին։ Այս մասին հաղորդում է The Guardian-ը՝ վկայակոչելով դիվանագիտական իր աղբյուրները։
Նշվում է, որ միջադեպը տեղի է ունեցել գագաթնաժողովի պաշտոնական բացման ժամանակ: Հրապարակման աղբյուրների համաձայն, Թրամփը պնդել է, որ Ռուսաստանը պետք է վերադառնա G7 և չի համաձայնվել իր գործընկերների հետ, ովքեր չեն պաշտպանել իր գաղափարը:
Սեղանի շուրջ հավաքված G7 ղեկավարներից միայն Իտալիայի վարչապետ Ջուզեպե Կոնտեն է համաձայնել Թրամփի առաջարկի հետ։
Ճապոնիայի վարչապետ Սինձո Աբեն չեզոքություն է պահպանել, իսկ Մեծ Բրիտանիայի վարչապետ Բորիս Ջոնսոնը, Գերմանիայի կանցլեր Անգելա Մերկելը, Կանադայի վարչապետ Ջասթին Թրյուդոն, Ֆրանսիայի նախագահ Էմանուել Մակրոնը և ԵԽ ղեկավար Դոնալդ Տուսկը վճռականորեն դեմ են հանդես եկել G7 ձևաչափ վերադառնալուն։
«Այդ պահին, մեղմ ասած, իրավիճակը սկսեց թեժանալ»,-մեջբերում է պարբերակը եվրոպացի դիվանագետի խոսքերը: «Առաջնորդներից շատերը պնդում էին, որ G7-ն իր ձևաչափով նման է ընտանիքի, ակումբի, լիբերալ ժողովրդավարության սկզբունքների միության, ուստի նրանք ասացին [Թրամփին], որ դուք չեք կարող թույլ տալ, որ նախագահ Պուտինը, ով չի համապատասխանում այս չափորոշիչներին, վերադառնա»,- հաղորդում է աղբյուրը: Թրամփի համար սա կարևոր պայման չէ: Թրամփը պնդում էր, որ Իրանի, Սիրիայի և Հյուսիսային Կորեայի հարցերը քննարկելու համար անհրաժեշտ է Ռուսաստանի ներկայությունը:
Ընթրիքից հետո G7-ի բոլոր առաջնորդների լուսանկար է նախատեսվել, սակայն միջոցառումն անսպասելիորեն չեղարկվել է։

Ռուսաստանը «Մեծ ութնյակ»-ից դուրս մնաց 2014-ին՝ Ղրիմը բռնակցելու հետևանքով: