Իրկուտսկում ջրի մակարդակը ժամ առ ժամ բարձրանում է. կամուրջներն ու տները ջրի տակ են անցել

ՌԴ արտակարգ իրավիճակների նախարարությունը նոր տվյալներ է հայտնում Իրկուտսկ երկրամասում ջրերի վարարման հետևանքների մասին:

Հիշեցնենք, որ Իրկուտսկում հունիսի 27-ից արտակարգ դրություն էր հայտարարվել: Գետերի մակարդակի կտրուկ բարձրացման հետևանքով երկրամասում մասամբ խափանված է տրանսպորտային ցանցը, Թուլունի կամուրջները ջրի տակ են անցել, փակվել է Կրասնոյարսկ-Իրկուտսկ ճանապարհը:

Երկրամասի 10 սոցիալական նշանակության օբյեկտներում, 44 կմ ճանապարհ և 18 բնակեցված շրջաններում արդեն վերականգնվել է էլեկտրամատակարարումը:

Տուժածներին տրամադրվել է 7 տոննա սննդամթերք և 4,5 տոննա ջուր:

Ըստ տարածված հաղորդագրության՝ 3 շրջան շարունակում է մնալ մնալ ջրի տակ: 4130 բնակարան ևս անցել է ջրի տակ, այնտեղ բնակվում էին 9325 բնակիչ, որոնցից 2208-ը՝ երեխաներ:

Նշվում է, որ ամենադժվար իրավիճակը Թուլունի շրջանում է, որտեղ ջրի տակ է անցել 143 փողոց, երկու կամուրջ և բնակելի օբյեկտներ:

Ներքին գործերի նախարարության տվյալներով՝ զոհվել է 12 մարդ, ևս 9 մարդ անհետ կորած է: