Երևան`   +26 °C
Այսօր`   Կիրակի, 25 օգոստոսի, 2019 թ.

Սենատում հակառուսական նոր «դժոխային» պատժամիջոցներ են պատրաստում. թիրախում են նաև Հայաստանում գործող ռուսական բանկերը

2247
Հինգշաբթի, 14 փետրվարի, 2019 թ., 13:30
Սենատում հակառուսական նոր «դժոխային» պատժամիջոցներ են պատրաստում. թիրախում են նաև Հայաստանում գործող ռուսական բանկերը

Ամերիկացի սենատորները հակառուսական նոր «դժոխային» պատժամիջոցներ են պատրաստում, գրում է Forbes-ը՝ հղում անելով Reuters-ին:

Սահմանափակող միջոցներն ուղղված են ռուսական բանկերի, վառելիքաէներգետիկ համալիրների և ՌԴ նախագահ Վլադիմիր Պուտինի մտերիմ օլիգարխների դեմ:

Նախագիծը պատրաստել են հանրապետական սենատոր Լինդսի Գրեմն ու դեմոկրատ Բոբ Մենենդեսը:

Նախաձեռնության հեղինակներն առաջարկում են կոշտ պատժամիջոցներ սահմանել ռուսական բանկերի դեմ, որոնք «աջակցում են արտասահմանում ընտրություններին միջամտության փորձերը», ինչպես նաև ռուսական կիբեր ոլորտի և ֆիզիկական անձանց դեմ, ովքեր «ուղղակի կամ անուղղակի կապ են ունեցել նախագահ Վլադիմիր Պուտինի շահերի համար անօրինական և կոռուպցիոն գործողությունների հետ»: Սահմանափակող միջոցներն անդրադառնում են նաև ռուսական պետական պարտքի, ինչպես նաև նավթագազային ոլորտի վրա:

Բացի այդ, ըստ փաստաթղթի, պատժամիջոցներն անդրադառնում են նաև արտասահմանում ռուսական հեղուկ բնական գազի ոլորտում ներդրումներին:

Փաստաթղթում ասվում է նաև, որ խոսքը «Կրեմլի ագրեսիայից ԱՄՆ-ի անվտանգության պաշտպանության մասին ակտի» մասին է (Defending American Security from Kremlin Aggression Act, DASKA): Բանկերի թվում են՝ «ՎԷԲ», «Սբերբանկ», «ՎՏԲ», «Պրոմսվյազբանկ», «Ռոսսելխոզբանկ» և «Գազպրոմբանկ»:

Պատժամիջոցների նոր վարկածում միջոցները բաժանվում են 2 տեսակի:

Պատժամիջոցների առաջին խմբում են՝

- ռուսական բանկերը, որոնք ներգրավված են «օտարերկրյա ժողովրդավարական ինստիտուտների աշխատանքը խոչընդոտելու ռուսական փորձերին»,

- ներդրումներն արտասահմանում ռուսական հեղուկ բնական գազի ոլորտում,

- կիբեր ոլորտը,

- քաղաքական գործիչները, օլիգարխները, նրանց ընտանիքների անդամներն ու այլ քաղաքացիներ, ովքեր ուղղակի կամ անուղղակի կապ են ունեցել նախագահ Վլադիմիր Պուտինի շահերի համար անօրինական և կոռուպցիոն գործողությունների հետ:

Երկրորդ խմբում են՝

- Անվտանգության դաշնային ծառայության 24 գործակալները, ովքեր ներգրավված են Կերչի նեղուցում հարձակմանը,

- ռուսական նավաշինական ոլորտը,

- նավթային ռեսուրսների մշակումն ու դրա աջակցումը,

- արտասահմանում պետական էներգետիկ նախագծերը:

Նշենք, որ պատժամիջոցների թիրախում կան նաև Հայաստանում գործող ռուսական բանկեր: