Երևան`   +10 °C
Այսօր`   Երեքշաբթի, 17 նոյեմբերի, 2026 թ.

«Աշտարակ կաթ» ՓԲԸ-ի կողմից դատի տված անհատ ձեռներեցների հայտարարությունը

343
Հինգշաբթի, 07 փետրվարի, 2019 թ., 11:05
«Աշտարակ կաթ» ՓԲԸ-ի կողմից դատի տված անհատ ձեռներեցների հայտարարությունը

«Աշտարակ կաթ» ՓԲԸ կողմից դատի տված անհատ ձեռներեցները հաղորդագրություն են տարածել. «Մենք՝ Աշտարակ քաղաքի և շրջակայքի տասնյակից ավելի անհատ ձեռներեցներս, երկար տարիներ աշխատել ենք «Աշտարակ կաթ» փակ բաժնետիրության հետ՝ որպես վերջինիս ապրանքների սպառողներ: Աշխատանքի ընթացքում ոչ մի խնդիր երբևէ չենք ունեցել, աշխատել ենք կանխիկ գումարներով՝ առանց բանկային փոխանցումների: Երբ սննկացավ «Աշտարակ կաթ»-ի նախկին սեփականատերը, ապա նա մեզ մեղադրեց իր ապրանքի դիմաց իրեն գումարներ չտալու մեջ, և որոշեց, որ իր սննկացման պատճառը մենք ենք: Սա բացահայտ սուտ է և զրպարտություն մեր նկատմամբ նաև հակասում է որևէ տրամաբանության, քանի որ ստացվում է, որ տարիներ շարունակ «Աշտարակ կաթ»-ը մեզ հետ համագործակցել է այն դեպքում, երբ մենք նրան չեն վճարել իր ապրանքի դիմաց: Առաջին ատյանի դատարանները հոգուտ մեզ որոշումներ կայացրեցին՝ հիմք ընդունելով հենց «Աշտարկ կաթ»-ի աշխատողների վկայությունները, որոնք էլ մեզ ապրանք էին մատակարարում, և անձամբ ստանում գումարը: Սրանից հետո «Աշտարակ կաթ»-ի նախկին տերերը բողոքարկեցին վճիռը Վերաքննիչ դատարանում: Վերաքննիչն անցկացնելով փակ դատ, բավարարեց «Աշտարակ կաթ»-ի հայցը: Ցանկանալով ԶԼՄ-երի և հանրության ուշադրությունը հրավիրել այս անարդար որոշման դեմ՝ փետրվարի 7-ին՝ ժամը 13.00-ին, մեր բողոքի գործողությունն ենք իրականացնում ՀՀ կառավարության շենքի մոտ՝ Հանրապետության հրապարակում»:

Տեղեկացնենք, որ անհատ ձեռներեցների առաջին բողոքի ակցիան իրականացվել է փետրվարի 4-ին: