Երևան`   +3 °C
Այսօր`   Չորեքշաբթի, 18 նոյեմբերի, 2026 թ.

«Միասնական ժողովուրդը միշտ ուժեղ է». «Պոլիմետալ Արմենիա»-ն դադարեցնում է հանքի շահագործման ծրագիրը

394
Հինգշաբթի, 15 մարտի, 2018 թ., 15:45
«Միասնական ժողովուրդը միշտ ուժեղ է». «Պոլիմետալ Արմենիա»-ն դադարեցնում է հանքի շահագործման ծրագիրը

«Միասնական ժողովուրդը միշտ ուժեղ է: Սա առաջին փուլն էր պայքարի, որ տվեց իր միջանկյալ արդյունքը։ Պետք է շատ ուշադիր և միահամուռ լինել՝ հնարավորինս ներգրավելով բոլոր բնակավայրերի մարդկանց նաև Լոռիում»,- այս մասին ֆեյսբուքյան իր էջում գրել է «Հայկական բնապահպանական ճակատ»-ն՝ անդրադառնալով «Պոլիմետալ Արմենիա»-ի հայտարարությանն, ըստ որի՝ ընկերությունը դադարեցնում է Լոռիում և Տավուշում շրջակա միջավայրի վրա ազդեցության փորձաքննության ու հանրային քննարկման աշխատանքները:

Հիշեցնենք՝ բնապահպաններն ու լրագրողներն օրեր շարունակ բարձրաձայնում էին, որ ՍՊԸ-ի կողմից Նոյեմբերյանի սարերում հանքարդյունահանումը կործանարար հարված կլինի Նոյեմբերյանի բնությանը: «Դեբեդի ջրերով աղտոտվում են Նոյեմբերյանի տարածաշրջանի ավելի քան 1000 հեկտար այգիներ: Ծանր մետաղներով հագեցած գետի ջրով ջրով ոռոգելուց հետո ծառերի բները պնդվում են, կարծես ցեմենտած լինեն: Լոռու մարզում գործող հանքարդյունաբերական ընկերությունների մուծած բնապահպանական վճարներից առաջացած գումարից, 2017թ., առաջին և վերջին անգամ, 7 միլիոն դրամ է հատկացվել աղտոտված շրջակա միջավայրի ազդակիր Նոյեմբերյանի տարածաշրջանի համայնքներին, որպեսզի այդ համայնքներում առողջապահական և սոցիալական ծրագրեր արվեն: Այս տարի այդ նպատակով գումար չի նախատեսվել, կարծես թե Դեբեդի ջրերը զուլալվել են: Տավուշի մարզում մինչ այժմ մետաղական հանքավայրեր չեն շահագործվել, և հիմա այդ «բացն» ուզում են վերացնել: Եթե Նոյեմբերյանի սարերում, Աստված չանի, հանքեր շահագործեն, սահմանամերձ, անիրավությունից հուսահատված բնակչության արտագաղթը դեպի Ռուսաստան մեծանալու է, վաղը դպրոցներում աշակերտ չենք ունենա, սահմանին՝ սահմանապահներ»,- գրել էր Ոսկան Սարգսյանը: