«Սպիտակ տունը կարող է աշխատանքից ազատել իր նոր մամուլի քարտուղարին՝ առաջին իսկ ճեպազրույցից հետո». ԶԼՄ-ներ

Սպիտակ տան նոր մամուլի քարտուղար Քեթի Զաքարիան առաջին մամուլի ասուլիսի ընթացքում վատ է դրսևորել իրեն, ինչը կարող է հանգեցնել նրա մոտալուտ պաշտոնանկությանը։ Այս մասին, հղում կատարելով ԱՄՆ նախագահի վարչակազմի մի քանի խորհրդականների և պաշտոնյաների, հայտնում է CNN-ը։ Այդ մասին գրում է նաև MS NOW-ի լրագրող Ջեյք Թրեյլորը։ Հեռուստաալիքի զրուցակիցները քննադատել են նրա ելույթը՝ այն բնութագրելով որպես անսովոր, անհարմար և անբնական։

«Ամբիոնի մոտ ելույթ ունենալը հեշտ չէ, բայց նա հենց սկզբից սխալ ընթացք վերցրեց։ Նա պետք է զգալիորեն բարելավի իր աշխատանքը, և դա պետք է անի հնարավորինս արագ, հակառակ դեպքում կգերազանցի Սքարամուչիի ռեկորդը», — MS NOW-ի լրագրողին ասել է Սպիտակ տան պաշտոնյան։ Էնթոնի Սքարամուչին Սպիտակ տան հաղորդակցության գծով տնօրենի պաշտոնը զբաղեցրել է 2017 թվականի հուլիսին և այդ պաշտոնում աշխատել ընդամենը 11 օր։

Զաքարիայի ճեպազրույցը տևել է 15 րոպե, որի մեծ մասը հատկացվել է ներածական խոսքին, որի ընթացքում նա գովեստի խոսքեր է հնչեցրել նախագահ Դոնալդ Թրամփի հասցեին։ Այնուհետև նա հարցեր տալու հնարավորություն է ընձեռել ընդամենը երեք լրագրողի, որից հետո ավարտել է ճեպազրույցը։ Բացի այդ, լրագրողների հարցերին պատասխանելիս նա շփոթել է իր ամուսնուն և ԱՄՆ նախագահին։