«Մեր երկիրը վաղուց հասել է անդառնալիության կետին»․ Մարգարիտ Եսայան

ՀՀԿ ԳՄ անդամ Մարգարիտ Եսայանի ֆեյսբուքյան գրառումը․ «Իլոն Մասկը վերջերս հայտարարեց, որ հենց 2027-ն է լինելու անդառնալիության կետը։ Թե ինչ հաճախականության մեջ է նա դիտարկում իր այս պնդումը, ես չգիտեմ։ Երկրագնդի վրա և մարդկանց գլուխներում ամեն ինչ փոփոխական է, հարաբերական, տեղ-տեղ՝ ստամոքսաաղիքային, երբեմն՝ սեռաշեղումներով, և միայն՝ բացառիկ դեպքերում՝ մտավոր։ Արժե Մասկին զուտ մեկ օրինակով ցույց տալ, օրինակ, կոնկրետ մեր երկիրը արդեն վաղուց հասել է այդ անդառնալիության կետին։ Հասել է և հայավարի դեմ է առել անդառնալիության կետին հենց հայկական հաճախանակության մեջ, ադրբեջանա-թուրքական տարածաշրջանային խաչմերուկում և քարացած ու բութ հայացքով նայում է իր իսկ ոչնչացմանը, փնթի աճպարարի ձեռամբ իր պետականության անհետացմանը, իր հայրենիքի կոպերֆիլդյան ֆոկուսով տուփի մեջ հայտնվելու ընթացքին։ Դեռ դրա շուրջ ֆֆռում է, այդպես էլ չընդունելով, չհասկանալով, ծուլանալով ընկալել, չհամարձակվելով ընդունել, որ չեն լինում անդառնալիության կետեր։
Միշտ հնարավոր է վերադարձ և ընթացք, աստվածաշնչյան «դարձ ի շրջանս յուրը» հնարավոր է, ապացուցելի։
Ամեն ինչ հարաբերական է, ինչպես պնդում էր Էյնշտեյնը, ամեն ինչ միտքից է, ինչպես պնդում է Սոկրատեսը և միայն որոշ գոյացությունների համար է ամեն ինչ «անդրորովայնային», ինչպես պնդում էր Ֆրոյդը։
Վերջերս Արշակ Սրբազանը շատ դիպուկ գտավ այս բառը։ Սա այսօրվանների տիպիկ որակումներից է։
Հիմա գանք մեր իրականությանը՝ արդյոք անդառնալիության կետ չէ մեզ համար Արցախի խայտառակ կորուստը, հազարավոր տղաների սպանդը պայմանավորված պատերազմով, ՀՀ սահմանները չճանաչելը, մեր հայրենիքի 240 կմ-ում թշնամու զորքերի ներկայությունը, Հայ Առաքելական Եկեղեցու դեմ անհավատների վայրագ հարձակումը, կրթական, առողջապահապան, պաշտպանական համակարգերի քանդումն ու ավերումը։ Մի՞թե անդառնալիության կետ չէ օրը ցերեկով փողոցում մարդ սպանելը, ընտրված համայնքապետերին փակելը, Սրբազան Հայրերին փակելը, հայ մարդկանց գտնվելը թշնամու բանտերում, ամենամեծ հայ բարերար Սամվել Կարապետյանի անազատության մեջ գտնվելը․․։ Չշարունակեմ։ Դե, հիմա համեմատեք՝ անդառնալիության կետը ե՞րբ է, ումո՞վ է և պատասխանենք՝ մինչև ո՞ւր է ձգվելու այդ կետը։ Բայց և չմոռանանք՝ որևէ հաճախականության մեջ չեն լինում հավերժ անդառնալիության կետեր, լինում է նաև դարձի ճանապարհ»։