«Պատկան մարմինները զբաղված են «շպիոններ»-ով, գուցե զբաղվեն նաև ստեղծված քրեածին և վայրենածին վիճակով»․ Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը. ««Մի խումբ տղաներ վիճաբանել են, որի ժամանակ միջադեպի մասնակիցներից մեկը ընկել է գետնին ու, կռվի հակառակ թևի մասնակիցները, տեսնելով գետնին ընկած անձին, մեքենան մի քանի անգամ քշել են նրա վրա։
Նրանք այնքան են մեքենան վարել քաղաքացու վրա, որ նա վնասվածքներից մահացել է»:
Սա քրեա-սյուրռեալիստական վեպից դրվագ չէ: Սա լուր է Երևանում տեղի ունեցած հերթական ռազբորկա-վայրենությունից: Դեպքի վայրը՝ Նոր Նորք, Շոպրոնի փողոց:
Ոնց որ ասես՝ «շպիոնի» փողոց: Գուցե նաև ճիշտ կլինի այդպես ասել, որովհետև այդ դեպքում իհարկե գուցե այսպես կոչված պատկան մարմինները զբաղվեն Հայաստանում քրեածին և վայրենածին այս վիճակով: Չէ՞ որ «պատկան մարմինները» Հայաստանում զբաղված են միայն «շպիոնների» թեմայով, իրենց հետ բոլոր քաղաքական անհամաձայններին որակելով «գործակալ»:
Իհարկե զուգահեռ նաև կա նկատելի զբաղվածություն իրավապահ, մասնավորապես ոստիկանական համակարգի ռեբրենդինգով: Օրինակ, հիմա արդեն կա «ոստիկանական գրավդիա»: Արդեն Երևանում են համապատասխան «բրենդավորմամբ» մեքենաները:
Կարելի է նույնիսկ կարգախոս որոշել, օրինակ՝ «նորաոճ դիզայնով հարվածենք քրեական ենթամշակույթին»:
Իսկապես, քրեական ենթամշակույթի և վայրենության դեմ պետք է պայքարել ճաշակ թելադրելով: Քրեածին գործակիցը իջեցնելու ամենաճիշտ տարբերակը ճաշակ բարձրացնելն է՝ «ճաշակով Հայաստան» ռազմավարական հայեցակարգի ներդրմամբ»։