«Ասպետությունը մեր հասարակական հարաբերություններում չկա․ սա արժեքների խնդիր է»․ Միքայել Նահապետյան

Հասարակական, քաղաքական գործիչ Միքայել Նահապետյանի ֆեյսբուքյան գրառումը. «Մենք սպիտակ մարդու պես շոկի ենք ենթարկվել, բայց ես տխուր նորություն ունեմ. Հայաստանում գրեթե բոլորը բոլորին ծեծում են հենց այդպես՝ շատով մեկին ու դաժանաբար։ Ու դա, ցավոք, հասարակական հարաբերությունների նորմ է էս օնլայն տարածությունից դուրս։ Բացեք խուլիգանության, ծանր մարմնական վնասվածք հասցնելու, բանակում ինքնասպանություն հասցնելու հոդվածներով քրեական գործերը ու կտեսնեք թե ինչպես է գրեթե միշտ գրած «Ս.Ա-ն մի խումբ ինքնությունը չպարզված անձանց հետ միասին», «Ա.Բ.-ն, Խ.Հ.-ն, Պ.Կ-ն կենցաղային հարցերի շուրջ պարզաբանում ստանալու նպատակով»...
Ու սա արժեքների խնդիր է։ Ասպետությունը մեր հասարակական հարաբերություններում չկա՝ ոչ որպես տեսական կատեգորիա, ոչ էլ առավել ևս կենդանի օրինակների ձևով։
Էդ երեխեքը ի՞նչ են տեսել:
Տեսել են շատով թուղթ ստորագրող հետո թակ-թակ սողացող պարտված գեներալներ։
Տեսել են մեծ-մեծ խոսացող հետո ուրացող ու դավաճանող հոգևորականներ։
Տեսել են հեռուստատեսությամբ հայհոյող հետո կզած բուկետ բռնող համայնքի ղեկավարներ։
Տեսել են իրենց թիմակցի անձնական կյանքի տեղեկություններով նրան շատով հոշոտող պատգամավորներ։
Տեսել են ձեռքերը բռնած քաղաքացու վրա թքող ԱԺ նախագահ ու շատով մեկին ծեծող թաղապետ։
Տեսել են իր պարտությունը քաղաքացիական պատերազմով կոծկելու պատրաստ Նիկոլ։
Հերն անիծածը էս երկրում դաժե իրավապահներն են ձերբակալելիս շատով մեկին տշում։
Չի կարելի ապրել որպես թալիբան, բայց կրթել գերմանական սերունդ՝ չի լինում այդպես։ Արժեքներ են պետք, որոնք բացակայում են մեր կյանքից։ Բռնությունը ու պատիժները վերացնել հնարավոր չի լինի, դա ուղեկցում է մարդկությանը իր ծագման պահից ի վեր, ստանում մշակութային ու էսթետիկ նոր իմաստներ։ Բայց մասկուլինության ու ասպետության ըմբռնումը ձևափոխել հնարավոր է»։