«Կուսակրոնության ուխտը խախտելու մեղադրանքը լոկ միջոց է՝ Հայոց եկեղեցին հպատակեցնելու». Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Վարչապետ Նիկոլ Փաշինյանի դեմ նստած տեսնելով Նավասարդ արքեպիսկոպոս Կճոյանին՝ թերևս ամենասկանդալային մեր հոգևոր հայրերից մեկին, ես կրկին անգամ համոզվեցի, որ Հայաստանի իշխանությունների խնդիրը Հայոց եկեղեցին նորոգելը չէ:
Կուսակրոնության ուխտը խախտելու մեջ մեղադրանքը լոկ միջոց է Հայոց եկեղեցին հպատակեցնելու, որովհետև դու չես կարող կուսակրոնության ուխտի դեմ խոսել՝ դիմացդ ու կողքերիդ ունենալով հոգևոր հայրերի, որոնք զավակ են ունեցել ու ընտանիքներ քանդել:
Բիզնեսի մեջ մեղադրում ես հայ հոգևորականներին, բայց մի քանի բիզնեսներ ունեցող հոգևորականի ես հյուրընկալում:
Կասկած չունեմ, որ եթե Մայր Աթոռը չմտներ ներքաղաքական պայքարի մեջ, ապա Նիկոլ Փաշինյանը շարունակելու էր համբուրել Գարեգին Բ Ամենայն Հայոց կաթողիկոսի մեկնած խաչը:
Ու ահա այստեղ է Գարեգին Բ-ի կոպտագույն սխալը:
Տավուշի թեմի առաջնորդի սրբազան շարժումը չէր կարելի օրհնել, Բագրատ արքեպիսկոպոս Գալստանյանը կարող էր միայն մի դեպքում նետվել քաղաքական պայքարի մեջ, եթե մինչ այդ հեռանար եկեղեցուց և միայնակ կամ ընդդիմության հետ իշխանափոխություն փորձեր իրականացնել:
Ավելին, եթե Բագրատ սրբազանը չենթարկվեր Ամենայն Հայոցին, նա պետք է կարգալույծ արվեր:
Բայց պետք է գրել նաև մեր ընդդիմության կեցվածքի մասին:
Հայաստանի նախկին նախագահներից մի քանիսը օգտագործեցին Հայոց եկեղեցին իրենց նեղ քաղաքական շահերի համար և այսօր լուռ ու մունջ, պապանձված հետևում են ՀՀ իշխանություններ-Մայր Աթոռ այս թշնամական դիմակայությանը:
Նրանց լռությունը հավասար է անբարոյականության»: