«Հայաստանում տեղ չունի «ոհմակի իրավունքը»․ պետք է գործի միայն մարդու իրավունքը»․ Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը․ «Որևէ հասարակություն չի կարող լինել հաջողակ, զարգացած ու անվտանգ, եթե իր հիմքում դրված չեն մարդասիրական արժեքները, օրենքի գերակայությունը և մարդու արժանապատվության հստակ ընկալումը։ Երբ օրինապահ քաղաքացուն հրապարակավ անվանում են «անբարոյական», իսկ իրավապահներին դիմելը կոչվում է «գործ տալ», ձևավորվում է մի միջավայր, որտեղ օրենքը նվաստացված է, իսկ գողական «հասկացությունները»՝ հերոսացված։ Տարիներ շարունակ գողական կոդեքսները ներկայացվել են որպես «քաջություն» ու «մարդկություն», և այսօր դրա հետևանքներն ենք տեսնում մեր դպրոցներում, բակերում, սոցիալական ցանցերում։
Զորական գյուղի տեսանյութը հենց այս մշակույթի մերկ արտահայտությունն է։ Երբ բարձր դասարանների մի խումբ տղաներ խմբով հարձակվում են մեկ պատանու վրա, նվաստացվածը նա չէ, ում հարվածում են, այլ նրանք, ովքեր հարձակվում են։ Սա այլևս ոչ թե պարզապես բարոյական կամ «էսթետիկ» քննարկման թեմա է, այլ ազգային անվտանգության խնդիր, որովհետև բռնությունը, ցինիզմը և գողական «հասկացությունները» ներսից քայքայում են պետությունը ոչ պակաս, քան արտաքին ցանկացած սպառնալիք։
Պետությունն ու քաղաքական դաշտը պարտավոր են հստակ ընտրություն անել․ կամ կառուցում ենք օրինապատ, արժանապատիվ հանրություն, որտեղ գողական ենթամշակույթը տեղ չունի, կամ հաշտվում ենք այն մտքի հետ, որ բռնությունն ու ստորացումն են դառնում «նորմ»։ Սա կրթական համակարգի, ոստիկանության, արդարադատության, մեդիա քաղաքականության հարց է։ Գողական «հասկացությունները» չպետք է սնվեն քաղաքական ամբիոններից, շոու-բիզնեսից և կեղծ հայրենասիրական շոուներից։ Եթե ուզում ենք ապագա ունենալ, ապա հենց հիմա է պահը հստակ ասել․ Հայաստանում տեղ չունի ոհմակի իրավունքը։ Այստեղ պետք է գործի միայն մարդու իրավունքն ու օրենքի իշխանությունը»։