«Փաշինյանը մոլորված զավակ չէ, ինքը մոլորեցնող գայլ է»․ Տեր Վրթանես քահանա Բաղալյան

«Նիկոլ Փաշինյանը Հանրապետության համար 1 ստախոսն է։ Նա ողջունել է եպիսկոպոսներին քաջության և համարձակության համար, իսկ եթե Նիկոլ Փաշինյանը մեկին քաջ է կոչում՝ խոսում է այն մասին, որ նա վախկոտ է, եթե համարձակ է ասում, ուրեմն լկտի պահվածք ունի, և Նիկոլ Փաշինյանին իմանալով մենք հասկանում ենք, որ որևէ մեկին, ում ինքը գովում է՝ վարկաբեկվում է։ Եթե Նիկոլ Փաշինյանի, Գնել Սարգսյանի նմանները մեզ քննադատում են, շատ ուրախ ենք, եթե ոմանց Նիկոլ Փաշինյանը գովում է, արդեն ամոթ է իրենց»,- այսօր Մայր Աթոռի բակում լրագրողների հետ զրույցում ասաց Տեր Վրթանես քահանա Բաղալյանը։

«Փաշինյանը մոլորված զավակ չէ, ինքը մոլորեցնող գայլ է և մեր բարեպաշտ ժողովրդին էլ գառան մորթով գայլերից զգուշացնում ենք, ինքը գառան մորթով գայլ է։ Իր արարքների համար եթե ինքն անգամ զղջա, խոստովանի, կարծում եմ՝ չի կարող հատուցել»,- հավելեց Տեր Վրթանեսը։