«Մեղավոր ու սխալ է Վեհափառը ու հենց նա էլ պիտի ուղղի իր սեփական սխալները՝ ցանկացած գնով». Սամվել Աշոտյան

Տվյալների վերլուծաբան Սամվել Աշոտյանը ֆեյսբուքյան իր էջում գրել է. «Արքեպիսկոպոս Կճոյանը՝ հասարակությանը հայտնի՝ որպես «Բենտլի Սամո», հոգևոր նորոգում է պահանջում։
Ես երկար ժամանակ չէի անդրադառնում ՀԱԵ շուրջ տեղի ունեցող իրադարձությունների արմատական պատճառներին ու թե ինչու է Նիկոլի լեզուն այդքան երկարել, իսկ հասարակական տրամադրություններն՝ այդքան ոչ միանշանակ։ Պարզապես չէի ցանկանում վնաս հասցնել այնպես էլ բարդ իրավիճակում հայտնված եկեղեցուն՝ թողնելով քննադատություններս խաղաղ ժամանակներին,
բայց այլևս չեմ լռելու։
Պարոն Կճոյան, եթե անկեղծ, Հայ Առաքելական Եկեղեցու համբավն այսքան խորապես արատավորած հոգևորականի երևի դժվար կլինի գտնել, ինչպիսին դուք եք։
Ու այո՛, մեղավոր է Վեհափառը։ Քանի որ երբ հասարակությունն սպասում էր իր հեղինակավոր խոսքին ու Կճոյանի այս ամբարիշտ ապրելակերպը սաստելուն, նա ականջալուր չեղավ։
Ու այո՛, մեղավոր է Վեհափառը, քանի որ իրեն մեծապես շրջապատել է անսկզբունք ու ամբարիշտ մարդկանցով ու թեմերը մեծամասամբ վստահել ոչ թե արժանիներին, այլ հարմարներին։ Շատ հաճախ էլ՝ սաստել արդարացի բողոքի ձայն բարձրացնողներին ու ձայն տվել ականջահաճո խոսքեր շռայլողներին։
Այո՛, մեղավոր ու սխալ է Վեհափառը ու հենց նա էլ պիտի ուղղի իր սեփական սխալները՝ ցանկացած գնով։
Այսօր Վեհափառն ունի երկընտրանք՝ մնալ պատմության մեջ որպես իր կյանքը Մայր Աթոռի պաշտպանությանը նվիրած մեծ Կաթողիկոս կամ էլ գլխիկոր ու ամոթալի կերպով Մայր Աթոռը հանձնող։ Ընտրությունն իրենն է։
Աստված պահապան Հայ Առաքելական Սուրբ Եկեղեցուն, Հայ Ազգին ու Հայոց Պետականությանը»։