«Իշխանության մոտ չկա միատեսակ դիրքորոշում կարևոր հարցերում»․ Սևակ Հակոբյան

Լրագրող, խմբագիր Սևակ Հակոբյանի ֆեյսբուքյան գրառումը՝ կից տեսանյութով. «Բիշքեկում տեղի է ունենում ՀԱՊԿ գագաթնաժողովը՝ Հայաստանի բացակայությամբ։ Չեն մասնակցում, բայց ասում են՝ դեմ չենք ՀԱՊԿ-ի որոշումներին։ Հայաստանի այս կառավարության քայլերում տրամաբանություն գտնելը սովորական մահկանացուներիս համար մի քիչ բարդ է։ Բայց պարզ է, որ իշխանության մոտ չկա միատեսակ դիրքորոշում կարևոր հարցերում։ Նույն օրը նույն վայրում մեկ ժամ տարբերությամբ ՀՀ երկու կարևոր պաշտոնյաներ իրար հակառակ բաներ են հայտարարում ՀԱՊԿ մասով։
ԱԳն փոխնախարար աշխատողն ասում է ՀԱՊԿ-ից դուրս գալու որոշում չունենք, ԱԺ նախագահ աշխատողն ասում է՝ «Դե փաստացի դուրս եկած ենք»։
Հիմք ընդունենք վերջի՞ն հայտարարողի ասածը, թե՞ ոչ մեկն էլ։ Մեկն ասում է՝ դուրս չենք գալիս, մեկն ասում է՝ դեռ չենք որոշել, էն մեկն ասում է՝ հասել ենք անդառնալիության կետին, էն մեկն ընդհանրապես ասում է՝ փաստացի դուրս եկած ենք։
Սա կառավարման քաոսի մասին է, երբ իշխանության մի օղակը չգիտի մյուս օղակն ինչ որոշում ունի նույն հարցում, կապը չկա, տրամաբանությունը չկա նրանց քայլերում, չկա ընդհանուր դիվանագիտություն, պետության և իշխանության միասնական դիրքորոշում։ Կառավարման էդ մակարդակն է մեզ հասցրել էս օրին, որ պարտվել ենք պատերազմում, որ հեռացել-զրկվել ենք ռազմավարական դաշնակցից, անվտանգային գործընկերներից և մնացել առանց անվտանգային երաշխավորի։
Լավ, ՀԱՊԿ-ից հրաժարվում եք, ասենք, ո՞վ է փոխարինելու, Թուրքիան ու Ադրբեջա՞նը, ակտիվ զինվում է, որ մեզ պաշտպանի՞։ Անվտանգային հզոր կառույցի փոխարեն այսօր հույսը նախաստորագրված մի փաստաթղթի վրա է։ Կիսատ-պռատ մի թուղթ՝ ընդդեմ բայրաքթարի»։