«Ինչո՞ւ «Մոսկվա» կինոթատրոնը դեռևս չի կրում Ազնավուրի անունը»․ Դավիթ Սանասարյան

«Ինքնիշխան Հայաստան» կուսակցության նախագահ Դավիթ Սանասարյանի ֆեյսբուքյան գրառումը․ «Իսկ դուք ինչ եք կարծո՞ւմ․ ինձ ավելի շատ հետաքրքրում է այն, թե ինչու «Մոսկվա» կինոթատրոնը դեռևս չի կրում Ազնավուրի անունը։ Մի՞թե դժվար է պատկերացնել, թե որքան արժանապատիվ ու խորհրդանշական կլիներ այդ քայլը։
Վաղուց ժամանակն է հրաժեշտ տալ խորհրդային ժառանգությունից մնացած «Մոսկվա» անվանը։ Մեր մշակութային սրտում մեզ հարազատ, մեզ բնորոշ անուններ են պետք, որոնք կարտացոլեն մեր իրական դեմքն ու արժանապատվությունը։ Մշակութային ինքնիշխանությունը սկսվում է հենց այս պարզ, բայց խորհրդանշական քայլերից։
Երբ մենք մեր քաղաքի սրտում պահում ենք այլ երկրի մայրաքաղաքի անունը, ակամայից արտացոլում ենք ուրիշի մշակութային ազդեցությունն ու մեր ինքնության թուլությունը։ Պետք է ավելի խիզախ և վճռական լինենք, և օր առաջ սկսենք ձևավորել մեր քաղաքի դեմքն ու պատմությունը՝ մեր մեծերի, մեր արժեքների և մեր երազանքների հիմքի վրա»։