«Չվճարող ուղևորները 1-2 շաբաթից կտուգանվեն»․ Լևոն Հովհաննիսյան

ԱԺ-ն երեկ ՔՊ խմբակցության պատգամավորների կողմ ձայներով, երկրորդ ընթերցմամբ և ամբողջությամբ ընդունեց տրանսպորտի ուղեվարձը չվճարելու համար տուգանք նախատեսելու վերաբերյալ օրինագիծը: Ըստ օրենքի՝ քաղաքացիները 15 հազար դրամով կտուգանվեն, եթե հանրային տրանսպորտից օգտվելիս չվճարեն ուղեվարձը կամ օգտագործեն մեկ այլ քաղաքացու տոմս։

Այս թեմայի շուրջ «Ֆակտոր»-ի հետ զրույցում Երևանի փոխքաղաքապետ Լևոն Հովհաննիսյանը նշեց, որ այս օրենքը կկիրարկվի մեկ կամ երկու շաբաթից հետո։ «Մեզ համար սա, նախևառաջ, ոչ թե վարչական իրավախախտումներով հավելյալ գումար հավաքելու գործիք է, այլ տրանսպորտի ուղեվարձի հավաքագրումը կանոնակարգելու»,- ասաց Հովհաննիսյանը։

Անդրադառնալով հարցին, թե ով և ինչպես է տուգանելու քաղաքացիներին, փոխքաղաքապետը նշեց, որ հսկիչներ կլինեն, որոնք, սակայն, միաժամանակ բոլոր ավտոբուսներում չեն կարող հերթապահել։