Անի Բադալյանն արձագանքել է Սթիվ Վիթքոֆի հայտարարությանը

ԱԳՆ մամուլի քարտուղար Անի Բադալյանն արձագանքել է ԱՄՆ նախագահ Դոնալդ Թրամփի հատուկ ներկայացուցիչ Սթիվ Վիթքոֆի այսօրվա հայտարարությանը, որտեղ նա ասել էր, որ Հայաստանն ու Ադրբեջանը կարող են միանալ Աբրահամյան համաձայնագրերին: «Ամերիկյան կողմի հետ երկխոսության շրջանակներում քննարկվում են տարբեր թեմաներ. ինչպես ձևավորված ռազմավարական գործընկերությունը, այնպես էլ տարածաշրջանում խաղաղության հաստատմանը նպաստող նախաձեռնությունները, իհարկե, կարող են նոր հնարավորություններ տալ»,- նշել է նա «Սիվիլնեթ»-ի հետ զրույցում:
Նշենք, որ այսօր ավելի վաղ Սթիվ Վիթքոֆը Breitbart News-ի հետ զրույցում հայտարարել էր, որ Հայաստանը և Ադրբեջանը ևս կարող են միանալ Աբրահամի խաղաղության համաձայնագրերին։
Ըստ Ուիթքոֆի՝ երկրների միջև հակամարտությունների կարգավորմանը շատ մոտ են։

«Աբրահամյան համաձայնագրեր» (անգլ.՝ Abraham Accords) անվանում են դիվանագիտական փաստաթղթերին, որոնց միջոցով Իսրայելը 2020 թվականին հաստատեց դիվանագիտական հարաբերություններ մի շարք արաբական երկրների հետ՝ հատկապես Արաբական Միացյալ Էմիրությունների, Բահրեյնի, հետագայում՝ Սուդանի և Մարոկկոյի հետ։ Այն կնքվել է Դոնալդ Թրամփի նախագահության առաջին ժամկետում։ Դրանով կողմերը հաստատում են դիվանագիտական հարաբերություններ, ընդունում են միմյանց ինքնիշխանությունը, համաձայնում են տնտեսական, տեխնոլոգիական, գիտական և մշակութային համագործակցության զարգացման։ «Աբրահամյան» անունն ընտրվել է ի նշան այն բանի, որ եռակողմ համաձայնագիրը միավորում է աբրահամյան կրոնների՝ հրեության, քրիստոնեության և իսլամի հետևորդներին։